काठमाडौं । एथलेटिको म्याड्रिडबाट बार्सिलोना पुगेका फ्रेन्च फुटबलर एन्टोनी ग्रिजम्यानले आफुलाई लियोनेल मेस्सीले अझै स्वागत नगरेको बताएका छन् ।
मेस्सीले अहिले अधिकांश समय परिवारलाई दिईरहेका छन् । प्रि-सिजन अघि छुट्टी मनाउन बसेका मेस्सीले समुन्द्रमा श्रीमती र छोराहरुसँग रमाई रहेको ‘हट’ तस्बिर सार्वजनिक समेत गरेका थिए ।
प्रि–सिजन टुर अन्तर्गत हाल जापानमा रहेको बार्सिलोनाको मंगलबारको चेल्सीविरुद्धको खेल अघि मिडियासँग कुरा गर्दै ग्रिजम्यानले आफुलाई लुइस स्वरेजले फोन गरेर स्वागत गरेको र अन्य खेलाडीले स्वागत गरेपनि
मेस्सी ले भने अझै स्वागत नगरेको बताएका हुन् ।
ग्रिजम्यान बार्सिलोना आउनु अघि मेस्सीले ग्रिजम्यानको ठाँउमा नेइमारलाई ल्याउन क्लबलाई आग्रह गरेकै कारण खटपट भएको संचार माध्यमहरुले उल्लेख गरेका छन् । यसअघि ग्रिजम्यानले बार्सिलोनामा मेस्सीसँगै खेल्न आफू आतुर रहेको बताएका थिए ।
ग्रिजम्यानले भनेका छन्, ‘हो आश्चर्यजनक हुनेछ । म यो जान्न उत्साहित छु कि मेस्सी दिनदिनै के रुचाउँछन्, ट्रेनिङमा के मन पराउँछन् ।’
बर्सिलोनाले जुलाई २३ तारिखदेखि प्रिसिजनको अभ्यास खेल सुरु गरेको छ । बार्सिलोनाले जापान भ्रमणबाट प्रिसिजनको तयारी गरेको हो । जापानमा बार्सिलोनाले पहिलो खेल इङ्लिस क्लब चेल्सीसँग खेलेको छ । उसले पहिलो खेलमा नै २–० को हार बेहोरेको छ । हिजो भएको खेलमा प्रिमियर लिग क्लब चेल्सीसँग बार्सिलोना २–१ गोलले पराजित भएको हो । चेल्सीको जितमा टम्ये अब्राहम र रोस बेर्कलीले समान एक एक गोल गरेका थिए । यता बार्सिलोनाको लागि एक मात्रै गोल इभान रकिटिचले गरे ।
आफ्ना मुख्य खेलाडी लुइस स्वारेज र फिलिपे कौन्टिन्हो बिनै मैदान उत्रिएको बार्सिलोनाले खेलको ३४ औं मिनेट मै गोल खाएको थियो । बार्सिलोनाका डिफेन्डर र गोलकिप्पर बिट हुँदा चेल्सीका टम्ये अब्राहमले बललाई गोल पोष्टको दिशा दिदै १–० को अग्रता दिलाएका थिए ।
पहिलो हाफसम्म बराबरी खेलेको बार्सिलोनाले दोस्रो हाफमा थप एक गोल खायो । खेलको ८१ औं मिनेटमा रोस बेर्कलीले चेल्सीको लागि गोल गर्दै अग्रता २–० बनाए । खेलको ९० औं मिनेटमा रकिटिकले गोल गर्ने मौका गुमाएका थिए । त्यसको एक मिनेट पछि नै उनले डि बक्स बाहिरबाट गोल गर्दै खेल २–१ को अन्तरमा झारे । त्यसपछि बाँकी समयमा कुनै गोल नहँुदा चेल्सीले २–१ गोलको जित हात पार्यो ।
यता मेस्सी अगस्ट ४ तारिख आर्सनलविरुद्धको खेलमा उपस्थित हुने बार्सिलोनाले जनाएको छ । बार्सिलोनाले अगस्ट ७ र १० मा नापोलीसँग पनि दुई खेल खेल्दैछ । स्पेनिस ला लिगामा भने बार्सिलोनाले अगस्ट १६ तारिखमा एथ्लेटिक बिल्बाओसँग खेल्दै सन् २०१९–२०२० सिजनको सुरुवात गर्नेछ ।
