काठमाडौं । विश्वको सबैभन्दा बढी जनसंख्या रहेका चीन र भारतले अहिले कूल जनसंख्याको झण्डै ३६ प्रतिशत हिस्सा ओगटेका छन् । विश्वको हाल कूल जनसंख्या करिब ७ अर्ब ६७ करोड ८१ लाख रहेको छ ।
राष्ट्रसंघका अनुसार हाल चीनको जनसंख्या एक अर्ब ३९ करोड ८५ लाख र भारतको जनसंख्या एक अर्ब ३७ करोड ३६ लाखको हाराहारीमा छ ।
तर यो जनसंख्यामा आगामी ८० वर्ष अर्थात् सन् २१०० सम्ममा नाटकीय रुपमा परिवर्तन आउँदैछ । विश्व जनसंख्यामा चीनलाई भारतले उछिन्ने संकेत देखिएको अनुसन्धाताहरुले बताएका छन् ।
एक रिपोर्ट अनुसार सन् २१०० मा भारतको जनसंख्या एक अर्ब ६६ करोड पुग्नेछ भने चीनको जनसंख्या घटेर एक अर्बको हाराहरीमा रहनेछ । चीनले जनसंख्या वृद्धिदर घटाउन एक दम्पती एक बच्चाको नीति अवलम्बन गरेसँगै जनसंख्या घट्दो दरमा देखिएको छ ।
हाल विश्व जनसंख्यामा तेस्रो स्थानमा रहेको अमेरिकालाई सन् २१०० सम्ममा नाइजेरियाले ठूलो फरकका साथ उछिन्ने अनुमान गरिएको छ । हाल नाइजेरियाको भन्दा अमेरिकाको जनसंख्या झण्डै १३ करोड बढी छ तर सन् २१०० मा नाइजेरियाको जनसंख्या अमेरिकाको भन्दा ३० करोडले बढी हुनेछ ।
तेस्रो स्थानमा नाइजेरिया (७५ करोड), चौथो अमेरिका (४५ करोड), पाँचौं कंगो (३९ करोड), छैटौं पाकिस्तान (३६ करोड), सातौं तान्जानिया (३० करोड), आठौं इन्डोनेसिया (२४ करोड), नवौं इथियोपिया (२४ करोड) र दशौं स्थानमा नाइजर (२१ करोड) हुनेछ ।
त्यसैगरी युगान्डाको २० करोड, ब्राजिलको २० करोड, इजिप्ट र ब्राजिलको २०–२० करोड, बंगलादेश र फिलिपिन्सको १७–१७ करोड जनसंख्या पुग्नेछ । जनसंख्या वृद्धिको वर्तमान स्वरुप हेर्दा गरिबी, द्वन्द्व झेलिरहेका एसिया, अफ्रिका र दक्षिण अमेरिकी मुलुकहरुको जनसंख्या वृद्धि तिब्र गतिमा भइरहेको देखिन्छ । नेपालको हालको जनसंख्या करिब २ करोड ९८ लाख रहेको छ । विश्व जनसंख्याको आधारमा नेपाल हाल ४८औं स्थानमा रहेको छ ।
