काठमाडौँ । परराष्ट्रमन्त्री डा नारायण खड्काले गणतन्त्र टर्कीका विदेशमन्त्री मेभलुत काभुसोग्लुसँग आज एन्टाल्या कूटनीति मञ्चको साईडलाइनमा द्विपक्षीय भेटवार्ता गर्नुभयो । भेटमा उहाँहरुबीच द्विपक्षीय सम्बन्ध र आपसी सहयोगका महत्वपूर्ण पक्षबारे समीक्षा भएको परराष्ट्र मन्त्रालयले जनाएको छ । उहाँहरुबीच दुई देशबीचको द्विपक्षीय व्यापार र लगानीका अवसरलाई थप विस्तार गर्न सहमत हुनुभएको छ ।
सो अवसरमा मन्त्री खड्काले रुस र युक्रेनका विदेशमन्त्रीलाई वार्ताको टेबुलमा ल्याउन टर्कीले खेलेको भूमिकाको प्रशंसा गर्दै कूटनीति र वार्ताबाट जारी द्वन्द्वलाई दिगोरुपमा समाधान हुने विश्वास व्यक्त गर्नुभयो । टर्कीकका विदेशमन्त्री काभुसोग्लुले नेपाल र टर्कीबीच पारस्परिक हितका क्षेत्रमा उत्पादनशील साझेदारी अभिवृद्धि गर्ने प्रतिबद्धता व्यक्त गर्नुभयो। साथै परराष्ट्रमन्त्री खड्काले बहराइन अधिराज्यका विदेशमन्त्री डा अब्दुललातिफ बिन रसिद अल जायनीसँग पनि भेटवार्ता गर्नुभयो ।
त्यस अवसरमा मन्त्री खड्काले बहराइनमा रहेका नेपाली आप्रवासी कामदारको हितको रक्षा गरेकामा बहराइन सरकारको प्रशंसा गर्नुभयो । दुवै मन्त्रीबीच दुवै पक्षले आर्थिक सहयोग विस्तार गर्ने र जनता–जनताबीचको सम्पर्क र पर्यटन प्रवर्द्धन, विशेषगरी पर्वतारोहण क्षेत्रलगायतका विषयमा विचार आदानप्रदान भएको थियो । यसअघि बिहीबार बिहान परराष्ट्रमन्त्री खड्का र उहाँको प्रतिनिधिमण्डललाई कृषि, निर्माण, आतिथ्य र स्वास्थ्य जस्ता विभिन्न क्षेत्रका प्रतिनिधित्व गर्ने टर्कीका उद्यमीहरूको समूहसँग अन्तरक्रियाका लागि कोन्याल्टी जिल्लाको व्यापारिक सङ्घ कोनिसियाडले स्वागत गरेको थियो ।
नेपाली प्रतिनिधिमण्डलले नेपाल र टर्कीबीच सम्भावित क्षेत्रमा सम्भावित व्यापार सहकार्यका लागि व्यवसायी समुदायसँग अन्तरक्रिया गरेको थियो । सो अवसरमा मन्त्री खड्काले टर्कीका व्यापारी समुदायलाई नेपालको अप्रयुक्त व्यापार अवसर खोज्न आमन्त्रण गर्नुभयो । अन्तरक्रियापछि प्रतिनिधिमण्डलले अन्टाल्या फ्री जोनको भ्रमण गरेको थियो ।
