काठमाडौँ — सुपुर्दगीसम्बन्धी विवादास्पद विधेयकको विरोधमा गरिएको प्रदर्शनका कारण हङकङको वर्तमान अवस्था निकै कठिन बनेको छ । प्रदर्शनकारीहरुको भिडको अत्याधिक चापका कारण सोमबार अपरान्हदेखि हङकङ अन्तर्राष्ट्रिय विमानस्थलबाट सबै उडान रद्द गरिएको छ ।

प्रहरीले प्रदर्शनकारीलाई तितरबितर गर्न आइतबार अश्रुग्यास तथा रबरका गोली प्रहार गरेपछि उनीहरुले प्रहरी विरुद्ध नाराबाजी गरिरहेको अन्तर्राष्ट्रिय सञ्चारमाध्यमहरुले जनाएका छन्। विमानस्थलको टर्मिनल पनि प्रदर्शनकारीहरुका कारण भरिएको छ।

सयभन्दा बढी उडान रद्द गरिएको छ। विमानस्थलमा ट्राफिक धेरै भएको र पार्किङ पुरै भरिएको अधिकारीहरुले जनाएका छन्। स्थानीय प्रहरीका अनुसार सोमबार मात्रै ५ हजार प्रदर्शनकारीहरु विमानस्थलमा प्रवेश गरेका छन्।आफ्ना मागप्रति अन्तर्राष्ट्रिय समर्थन जुटाउन भन्दै प्रदर्शनकारीले शुक्रबारदेखि विमानस्थलमा विरोध सुरु गरेका थिए।

एएफपीका अनुसार प्रदर्शनकारीले ‘तानाशाही शासन र प्रहरी दमनबाट हङकङलाई बचाऊ’ भन्दै नारा लगाइरहेका छन्। गतसाताको आमहडतालका कारण पनि २ सयभन्दा बढी हवाई उडान रद्द भएका थिए।संसारकै व्यस्त विमानस्थलमध्ये एक पर्ने हङकङ विमानस्थलमा सन २०१८ ७ करोड ५० लाख यात्रुहरु आएका थिए।