पोखरा अन्य जिल्लासँग जोडिने प्रमुख आवागमन केन्द्र भएकाले चाडपर्वको समयमा हुन सक्ने गैरकानुनी गतिविधि नियन्त्रण गर्न प्रहरीले उच्च सतर्कता अपनाएको जनाएको छ। यसैक्रममा पोखरा महानगरपालिका–२५, हेम्जास्थित सुइखेतमा विशेष सुरक्षा जाँच गरिएको छ।
गण्डकी प्रदेश प्रहरी कार्यालयको समन्वयमा सञ्चालन गरिएको जाँच अभियानमा लागुऔषध तथा विस्फोटक पदार्थ पत्ता लगाउन सक्ने विशेष तालिमप्राप्त कुकुरसमेत परिचालन गरिएको थियो।
कास्की प्रहरीका सूचना अधिकारी एवं प्रहरी नायब उपरीक्षक वीरेन्द्र पासवानका अनुसार यात्रुको सुरक्षित आवागमन सुनिश्चित गर्न र सम्भावित आपराधिक घटना रोक्न अभियान सञ्चालन गरिएको हो।
प्रहरीले जनपद प्रहरी र ट्राफिक प्रहरीको संयुक्त टोली परिचालन गरी पोखराका विभिन्न संवेदनशील क्षेत्रमा जाँच गरिरहेको छ। चाडपर्व अवधिभर आकस्मिक सुरक्षा जाँचलाई निरन्तरता दिइने प्रहरीले जनाएको छ।
प्रहरीले नागरिकलाई निर्धक्क भएर यात्रा गर्न तथा शान्ति सुरक्षा कायम राख्ने कार्यमा सुरक्षा निकायलाई सहयोग गर्न आग्रह गरेको छ।
