काठमाडौं । नेकपा एमालेका उपाध्यक्ष रघुजी पन्तले शक्तिशाली राष्ट्रले कमजोर राष्ट्रमाथि आफ्नो इच्छा र शर्त लाद्ने प्रवृत्तिको अन्त्य हुनुपर्ने बताउनुभएको छ ।
शुक्रवार काठमाडौंमा ‘महान ताङको पश्चिमी क्षेत्रको अभिलेख’ पुस्तकको नेपाली संस्करण विमोचन समारोहमा बोल्दै पन्तले विश्वमा शक्ति र प्रभावका आधारमा अन्तर्राष्ट्रिय सम्बन्ध सञ्चालन गर्ने प्रवृत्ति अन्त्य हुनुपर्ने बताउनुभएको हो ।
उहाँले नेपाल र चीनका जनता भगवान बुद्धका विचार र भावनाबाट प्रभावित रहेको उल्लेख गर्दै बुद्धका शिक्षाले शान्ति, सहअस्तित्व र आपसी सम्मानको सन्देश दिने बताउनुभयो । नेपाली समाजमा विभिन्न धर्म मान्ने भए पनि भगवान बुद्धप्रति विशेष सद्भाव, आस्था र विश्वास रहेको उहाँको भनाइ थियो ।
पन्तले हालै भारतमा सम्पन्न ब्रिक्स सम्मेलनमा चिनियाँ राष्ट्रपति सी चिनफिङले व्यक्त गरेको विचार ग्लोबल साउथका देशहरूका लागि महत्वपूर्ण रहेको बताउनुभयो । बलियो राष्ट्रको मात्रै जित हुनुपर्छ भन्ने तर्क स्वीकार्य नहुने भन्दै उहाँले अन्तर्राष्ट्रिय सम्बन्ध समानता र आपसी सम्मानका आधारमा अघि बढ्नुपर्ने धारणा राख्नुभयो ।
विश्वका शक्तिशाली राष्ट्रहरूले आफूले भनेको नमान्ने साना राष्ट्रमाथि आक्रमण गर्ने र दबाब सिर्जना गर्ने प्रवृत्ति देखिएको उल्लेख गर्दै पन्तले यस्तो व्यवहार स्वीकार्य नहुने बताउनुभयो । उहाँले अहिले विश्वमा व्यापार तथा ट्यारिफ युद्ध चलिरहेको भन्दै शक्ति र प्रभावका आधारमा देशहरूबीच सम्बन्ध निर्धारण गर्ने प्रवृत्तिमाथि प्रश्न उठाउनुभयो ।
उहाँले भन्नुभयो, ‘बलियाको नै जित हुनुपर्छ भन्ने तर्क मान्य हुँदैन र यसलाई धेरै पहिले नै त्याग्नुपथ्र्यो । हामीले देखिरहेका छौं, बलिया देशहरूले आफूले भनेको मानेन भनेर साना देशहरूमाथि आक्रमण गरिरहेका छन् । आफ्ना शर्त नमानेको भन्दै दबाब सिर्जना गर्ने र अहिले संसारमा ट्याक्स वार, टेरिफ वार चलिरहेको अवस्था छ ।’
पन्तले कृत्रिम बुद्धिमत्ता (एआई), डिजिटल प्लेटफर्मलगायत नयाँ प्रविधिको प्रयोगका विषयमा समेत विश्वव्यापी सहकार्य आवश्यक रहेको बताउनुभयो । प्रविधिको विकास र प्रयोग कुनै एक देश वा शक्तिको नियन्त्रणमा सीमित हुन नहुने उहाँको भनाइ थियो ।
ग्लोबल साउथका देशहरूले समानता, आपसी सम्मान र सहकार्यमा आधारित अन्तर्राष्ट्रिय व्यवस्थाका लागि आवाज उठाउनुपर्नेमा जोड दिँदै पन्तले विश्वमा कुनै एक देश वा शक्तिको हैकम चल्ने अवस्था स्वीकार गर्न नहुने बताउनुभयो ।
