काठमाडौं । भोटेकोशी नदीमा आएको बाढीका कारण प्रभावित रसुवास्थित माथिल्लो त्रिशूली–१ जलविद्युत् आयोजनाको सुरुङमा खोजी तथा उद्धार कार्य जारी छ ।
नेपाली सेनाको नेतृत्वमा आयोजनाका प्रतिनिधिसहितको संयुक्त उद्धार टोलीले सुरुङभित्र खोजी कार्यलाई निरन्तरता दिएको हो । सुरुङभित्र जमेको पानी र हिलो हटाउँदै जाने क्रममा फेला परेका मानव अङ्ग तथा शव निकाल्ने कार्य भइरहेको जनाइएको छ ।
बाढीका कारण आयोजनाको संरचनामा क्षति पुगेपछि सुरुङभित्र बेपत्ता भएका व्यक्तिको खोजीका लागि उद्धार टोली परिचालन गरिएको हो । सुरुङभित्रको पानी तथा हिलो क्रमशः हटाउँदै थप स्थानमा खोजी गर्ने काम भइरहेको छ ।
उद्धार टोलीले सुरुङभित्रको अवस्थालाई ध्यानमा राख्दै सावधानीपूर्वक खोजी तथा शव व्यवस्थापनको काम अघि बढाइरहेको छ । खोजी कार्य पूरा नभएसम्म सुरुङका विभिन्न भागमा निरन्तर अभियान सञ्चालन गरिने जनाइएको छ ।
