काठमाडाैँ । नेपाली कांग्रेसको केन्द्रीय कार्यसमितिको बैठक पार्टी केन्द्रीय कार्यालय सानेपामा केहीबेरमा बस्दैछ । पछिल्लो राजनीतिक घटनाक्रमपछि बस्न लागेको बैठकमा विभिन्न समूहमा रहेका केन्द्रीय सदस्यहरूको सहभागिता रहने भएको छ ।
पार्टीले १५औँ महाधिवेशनमा सहभागी हुन इच्छुक १४औँ महाधिवेशनबाट निर्वाचित केन्द्रीय कार्यसमितिका सदस्यहरूलाई विशेष महाधिवेशनबाट निर्वाचित केन्द्रीय समितिमा समायोजन गर्ने निर्णय गरेपछि यो पहिलोपटक केन्द्रीय समिति बैठक बस्न लागेको हो ।
बैठकमा यसअघि संस्थापनइतर समूहमा रहेका नेताहरूको समेत सहभागिता हुने भएको छ । पूर्वसभापति शेरबहादुर देउवा तथा पूर्वकार्यवाहक सभापति पूर्णबहादुर खड्कानिकट नेताहरू सभापति गगन थापासँग सहमति गरेर बैठकमा सहभागी हुन लागेका हुन् ।
त्यसैगरी, डा. शेखर कोइरालानिकट रहेका केही नेताहरू पनि बैठकमा सहभागी हुने तयारीमा छन् । पछिल्लो निर्णयपछि पार्टीको केन्द्रीय समितिमा देखिएको नयाँ समीकरण र आगामी महाधिवेशनको तयारीका विषयमा बैठकमा छलफल हुने अपेक्षा गरिएको छ।
