काठमाडौं । स्वास्थ्य तथा खाद्य स्वच्छता मन्त्री निशा मेहतासँग नेपालका लागि साउदी अरबका राजदूत फहद मोहम्मद ए. मनिखरले शिष्टाचार भेटवार्ता गर्नुभएको छ।
आज भएको भेटमा नेपाल–साउदी अरबबीचको सम्बन्ध, आपसी सहकार्य तथा स्वास्थ्य क्षेत्रमा सम्भावित सहयोगका विषयमा छलफल भएको छ।
भेटका क्रममा राजदूत मनिखरले भोटेकोशी बाढीबाट नेपालमा भएको क्षतिप्रति साउदी अरब सरकारको ऐक्यबद्धता व्यक्त गर्नुभएको थियो। उहाँले विपद्बाट प्रभावित नेपाललाई आवश्यक सहयोगका क्षेत्रलाई उच्च प्राथमिकताका साथ अघि बढाउने प्रतिबद्धता व्यक्त गर्नुभएको बताइएको छ।
मन्त्री मेहताले नेपाल र साउदी अरबबीच रहँदै आएको सुमधुर सम्बन्धलाई थप सुदृढ बनाउनुपर्नेमा जोड दिनुभयो। यस वर्ष नेपाल र साउदी अरबबीच कूटनीतिक सम्बन्ध स्थापना भएको ५० वर्ष पूरा भएको उल्लेख गर्दै उहाँले स्वर्ण जयन्तीलाई थप अर्थपूर्ण बनाउँदै जनस्तरसम्म सहकार्य विस्तार गर्नुपर्ने बताउनुभयो।
भेटमा स्वास्थ्य क्षेत्रसहित दुई देशबीच आपसी हित र सहकार्यका सम्भावित क्षेत्रलाई थप विस्तार गर्ने विषयमा समेत छलफल भएको थियो।
