काठमाडौं । परराष्ट्रमन्त्री शिशिर खनालले संयुक्त राष्ट्रसंघको महासभामा सहभागी हुन प्रधानमन्त्री बालेन्द्र साहको नेतृत्वमा नेपाली प्रतिनिधिमण्डल अर्को साता संयुक्त राज्य अमेरिका प्रस्थान गर्ने बताउनुभएको छ।
बिहीबार सिंहदरबारमा बसेको अन्तर्राष्ट्रिय सम्बन्ध तथा पर्यटन समितिको बैठकमा बोल्दै मन्त्री खनालले महासभामा नेपालको प्रतिनिधित्व प्रधानमन्त्रीको नेतृत्वमा हुने जानकारी दिनुभयो।
उहाँका अनुसार संयुक्त राष्ट्रसंघको महासभा अर्को सातादेखि सुरु हुँदैछ। महासभामा सहभागी हुने क्रममा नेपालले राष्ट्रिय हित, अन्तर्राष्ट्रिय सम्बन्ध तथा समसामयिक विश्व मुद्दासँग सम्बन्धित विषयलाई प्राथमिकताका साथ उठाउनेछ।
मन्त्री खनालले भन्नुभयो, “राष्ट्रसंघको महासभा अर्को हप्तादेखि सुरु हुँदैछ र नेपालको तर्फबाट सम्माननीय प्रधानमन्त्रीज्यूको नेतृत्वमा म लगायत एउटा प्रतिनिधिमण्डल अर्को हप्ता संयुक्त राष्ट्रसंघको महासभामा सहभागी हुन नेपालबाट प्रस्थान गर्दैछ।”
समितिको बैठकमा जलवायु परिवर्तनसम्बन्धी विषय विज्ञहरूसँग समेत छलफल गरिएको थियो। छलफलका क्रममा जलवायु परिवर्तनका कारण नेपालले भोगिरहेको जोखिम, जलवायु न्याय, अन्तर्राष्ट्रिय सहयोग तथा जलवायु वित्तलगायत विषयमा विज्ञहरूले धारणा राखेका थिए।
नेपालले अन्तर्राष्ट्रिय मञ्चमा जलवायु परिवर्तनका मुद्दालाई प्रभावकारी रूपमा प्रस्तुत गर्ने विषयमा पनि बैठकमा छलफल भएको थियो। महासभामा नेपालको सहभागितालाई अन्तर्राष्ट्रिय सम्बन्ध तथा कूटनीतिक प्राथमिकता प्रस्तुत गर्ने महत्वपूर्ण अवसरका रूपमा लिइएको मन्त्री खनालले बताउनुभयो।
महासभाका क्रममा नेपालले जलवायु परिवर्तनसँगै राष्ट्रिय हित र समसामयिक अन्तर्राष्ट्रिय मुद्दामा आफ्नो धारणा प्रस्तुत गर्ने तयारी गरेको छ।
