काठमाडौं । काठमाडौँको बुढानीलकण्ठस्थित गरुड क्यासिनोमा नेपाली नागरिकलाई प्रवेश गराई जुवा खेलाएको आरोपमा ११ जना पक्राउ परेका छन्।
जिल्ला प्रहरी परिसर काठमाडौं र प्रहरी प्रभाग बुढानीलकण्ठबाट खटिएको संयुक्त प्रहरी टोलीले सोमबार राति करिब २ बजे क्यासिनोमा छापा मारेको थियो। नेपाली नागरिकलाई क्यासिनोभित्र प्रवेश गराई क्वाइनमार्फत नगद सटही गरेर हारजित हुने गरी जुवा खेलिरहेको सूचना पाएपछि प्रहरीले चेकजाँच गरेको जनाएको छ।
चेकजाँचका क्रममा प्रहरीले जुवा खेल्न प्रयोग भइरहेको मोबाइल ९ थान तथा नगद सटहीका लागि प्रयोग हुने विभिन्न दरका क्वाइन बरामद गरेको छ। प्रहरीले ५० हजार रुपैयाँ अंकित क्वाइन ८ थान, १० हजार रुपैयाँ अंकित क्वाइन १९ थान, एक हजार रुपैयाँ अंकित क्वाइन ८८ थान र १०० रुपैयाँ अंकित क्वाइन ५ थान बरामद गरेको जनाएको छ।
त्यसैगरी, प्रहरीले नेपाली नगद १० लाख ८५ हजार ६ सय रुपैयाँसमेत बरामद गरेको छ। जुवा खेलिरहेको अवस्थामा फेला परेका ११ जनालाई प्रहरीले नियन्त्रणमा लिएको छ।
पक्राउ परेकाविरुद्ध जुवा सम्बन्धी कसुरमा अनुसन्धान अघि बढाइएको प्रहरीले जनाएको छ। उनीहरूलाई जिल्ला प्रशासन कार्यालय काठमाडौंबाट दुई दिनको म्याद थप अनुमति लिएर अनुसन्धान भइरहेको छ।
प्रहरीका अनुसार घटनाबारे थप अनुसन्धान जारी रहेको छ।
