काठमाडौं । नेपाली कांग्रेसका सांसद सुनिलबहादुर थापाले मनसुनसँगै हिमाल र हिमनदीलाई समेत जोडेर प्रभावकारी विपद् पूर्वसूचना प्रणाली विकास गर्नुपर्ने बताउनुभएको छ ।
बिहीवार राष्ट्रिय सभाको बैठकमा बोल्दै सांसद थापाले रसुवाको भोटेकोशीमा आएको बाढीले नेपालको पूर्वसूचना प्रणाली, उद्धार क्षमता तथा पूर्वाधार निर्माणको मोडलमाथि नै गम्भीर प्रश्न उठाएको बताउनुभयो ।
उहाँले विपद्का कारण परिवारजन गुमाउने, बेपत्ता हुने तथा कठिन परिस्थितिमा जीवन बिताउन बाध्य नागरिकको संख्या ठूलो रहेको भन्दै उनीहरूको आधारभूत आवश्यकता तत्काल सम्बोधन गर्न सरकार गम्भीर हुनुपर्नेमा जोड दिनुभयो ।
सांसद थापाले भोटेकोशी बाढीबाट घर, सडक, पुल, विद्यालय, स्वास्थ्य संस्था तथा खानेपानीलगायतका संरचनामा भएको क्षतिले मुलुकको अर्थतन्त्रमा समेत गम्भीर असर पारेको बताउनुभयो । विपद्बाट भएको ठूलो क्षतिका कारण अन्तर्राष्ट्रिय सहयोगका लागि समेत अपिल गर्नुपर्ने उहाँको भनाइ थियो ।
उहाँले भन्नुभयो, ‘आज नेपालको पूर्वाधार, विपद् पूर्वाधार, पूर्वसूचना, उद्धार क्षमता र पुनःनिर्माण प्रणालीमाथि पनि ठूलो प्रश्न उठेको छ । अब हामीले वर्षा मात्र होइन, हिमाल र हिमनदीलाई समेत जोडेर पूर्वसूचना प्रणाली विकास गर्नुपर्ने आवश्यकता रहेको छ ।’
विपद्बाट विस्थापित नागरिक र परिवारको पक्षमा राज्य दृढतापूर्वक उभिनुपर्ने बताउँदै थापाले तत्काल राहत, उद्धार, सुरक्षित आवास, खाद्यान्न, खानेपानी र स्वास्थ्य सेवाको व्यवस्था गर्नुपर्नेमा जोड दिनुभयो ।
उहाँले विपद् प्रभावित नागरिकलाई सुरक्षित आवासको व्यवस्था गर्दै उनीहरूको जीवनयापन सहज बनाउन राज्यले तत्काल प्रभावकारी कदम चाल्नुपर्ने बताउनुभयो ।
