काठमाडौं । राष्ट्रियसभाका १६ सदस्यले पत्रकार बन्नका लागि ‘पत्रकारिता व्यवसायी परीक्षा’ पास गर्नुपर्ने प्रस्ताव राखेका छन् । जो कोही पत्रकार हुने प्रचलनलाई कुण्ठीत गर्दै उनीहरुले पत्रकार बन्नका लागि परीक्षा पास गर्नुपर्ने भन्दै नेकपाका १६ जना राष्ट्रियसभा सदस्यले संसद सचिवालयमा प्रस्ताव दर्ता गराएका छन् ।
नेकपाका ठगेन्द्र प्रकाश पुरी मूल संशोधनकर्ता रहेको संशोधनमा अन्य १४ सांसदको समर्थन छ। सांसदहरु शेरबहादुर कुँवर, रामलखन चमार, उदयाशर्मा पौडेल, सिंहबहादुर विश्वकर्मा, खिमकुमार विश्वकर्मा, नन्दा चपाईं, युटोल तमाङ, हरिचरण शिवाकोटी, मिना बुढा, दिलकुमारी रावल, चक्र स्नेही, जीवन बुढा, भैरवसुन्दर श्रेष्ठ र कमलाकुमारी ओलीले परीक्षा प्रणालीको समर्थन गरेका छन्।
त्यस्तै राष्ट्रपतिबाट मनोनित सांसद विमला राई पौड्यालले पनि प्रेस काउन्सिलले पत्रकारको परीक्षा लिने व्यवस्था राख्न संशोधन दर्ता गराएकी छन्।
उक्त प्रस्तव पत्रमा परिक्षका लागि पाठ्यक्रम काउन्सिललेनै तयार गर्नुपर्ने प्रस्तावमा उल्लेख छ । यो परीक्षा मिडिया काउन्सिल अन्तर्गतको परीक्षा समितिले लिनेगरी वर्षमा दुई पटक पत्रकारिता पेशामा प्रवेश गर्नेका लागि परीक्षा सञ्चालन गर्नेगरी संशोधन गरिनु पर्ने उल्लेख छ । साथै पत्रकार बन्ने व्यक्तिले मौखिक र लिखित दुवै परीक्षा दिनुपर्ने उक्त प्रस्तावमा उल्लेख छ ।
त्यस्तैगरी पत्रकारिता गर्न कुनैपनि पत्रकारले पत्रकारिता विषयमा स्नातक गरेको हुनुपर्ने वा अन्य कुनै विषयमा स्नातक गरेको भए तीन वर्ष काम गरेको हुनुपर्ने वा निरन्तर सञ्चार प्रतिनिधि भई पाँच वर्ष काम गरेको हुनुपर्नेछ ।
त्यसपछि उनीहरुले पत्रकारिता व्यवसायी परीक्षा उतीर्ण हुनुपर्ने र नैतिक पतन देखिने फौजदारी अभियोगमा सजाय पाएको हुन नहुने प्रावधान विधेयकमाथिको संशोधन प्रस्तावमा उल्लेख छ ।
