बागमती। हेटौँडा उपमहानगरपालिकाले हालै आएको बाढी तथा विपद्को कारण प्रभावित नागरिकहरूमा पर्नसक्ने मनोवैज्ञानिक असरलाई लक्षित गरी निःशुल्क मनोसामाजिक सेवा सुुरु गरेको छ ।
बाढी तथा विपद् पश्चात् नागरिकमा डर, चिन्ता, मानसिक तनाव, असुरक्षाको भावना, निद्रा नलाग्ने, मन आत्तिने, टोलाउने तथा मानसिक रूपमा असहज महसुस हुने जस्ता लक्षण देखा पर्न सक्ने भन्दै उपमहानगरले यस्तो अवस्थाको न्यूनीकरणका लागि मनोसामाजिक सहयोग उपलब्ध गराउन सुरु गरेको सामाजिक विकास महाशाखाका प्रमुख भीमप्रसाद तिमल्सिनाले जानकारी दिनुभयो ।
विपद्पछिको अवस्थामा देखिने यस्ता समस्याहरू सामान्य मानवीय प्रतिक्रिया भएको उल्लेख गर्दै उहाँले मनोसामाजिक सेवा पश्चात् नागरिकमा आत्मविश्वास बढ्ने, भावनामा सहजता आउने, डर हराएर जाने र दैनिक जीवनमा सहजता आउने बताउनुभयो ।
डर, चिन्ता, मानसिक तनाव आदिका समस्या अनुभव गरिरहेको भएमा आफ्ना मनका कुरा सुरक्षित र गोप्य रूपमा व्यक्त गर्नका लागि मनोपरामर्शकर्ता उपलब्ध गराउँदै उपमहानगरले आवश्यकताअनुसार सेवा लिन सबैमा अनुरोध गरेको छ । उपमहानगरले यसअघि कोभिडको महामारीका समयमा पनि नागरिकका लागि मनोसामाजिक सेवा उपलब्ध गराएको थियो । रासस
—
