काठमाडौं । परराष्ट्र मन्त्रालयले बाढी तथा पहिरो प्रभावित क्षेत्रका सुरुङमा भइरहेको उद्धार तथा मानवीय क्षतिको यकिन विवरण संकलन र अद्यावधिक गर्ने काम भइरहेको जनाएको छ ।
बिहीवार आयोजित नियमित पत्रकार सम्मेलनमा मन्त्रालयका प्रवक्ता लोकबहादुर पौडेल क्षेत्रीले खोज तथा उद्धार कार्यलाई प्राथमिकतामा राखेर काम भइरहेको जानकारी दिनुभयो । उहाँका अनुसार सुरुङ तथा त्यस आसपासका क्षेत्रमा शव निकालिएको विवरण प्राप्त भए पनि ती शव सुरुङभित्रका श्रमिकका हुन् वा बाहिरी क्षेत्रका हुन् भन्नेबारे यकिन विवरण प्राप्त भइसकेको छैन ।
उहाँले सम्बन्धित निकायबाट आधिकारिक विवरण प्राप्त भएपछि सुरुङभित्र कति श्रमिक प्रभावित भएका थिए र कति जनाको उद्धार भयो भन्ने विषय स्पष्ट हुने बताउनुभयो ।
उद्धारमा प्रयोग भइरहेका मेसिनरी तथा उपकरणको अभाव र गुणस्तरका विषयमा सोधिएको प्रश्नमा प्रवक्ता क्षेत्रीले थप उपकरणको आवश्यकता महसुस गरी सहयोगका लागि साझेदार निकायहरूसँग अनुरोध गरिएको जानकारी दिनुभयो । यद्यपि, हाल प्रयोग भइरहेका उपकरण बिग्रिएको वा काम नलाग्ने अवस्थामा रहेको भन्नेबारे मन्त्रालयलाई कुनै औपचारिक जानकारी प्राप्त नभएको उहाँले स्पष्ट पार्नुभयो ।
प्रवक्ता क्षेत्रीले प्रभावित क्षेत्रमा कुन स्थान बसोवासका लागि सुरक्षित र कुन असुरक्षित छ भन्ने विषयमा सम्बन्धित निकायबाट अध्ययन भइरहेको पनि बताउनुभयो । हाल सरकारको मुख्य प्राथमिकता खोज तथा उद्धार रहेको भन्दै उहाँले उद्धार कार्य सम्पन्न भएपछि मात्र उत्थानशील पुनर्निर्माणको योजनाअनुसार विस्तृत अध्ययन अघि बढाइने जानकारी दिनुभयो ।
बाढी तथा पहिरोबाट प्रभावित कतिपय क्षेत्र भविष्यमा बसोवासका लागि असुरक्षित हुन सक्ने चर्चा भइरहे पनि त्यसबारे तत्काल निष्कर्षमा पुग्न नसकिने उहाँको भनाइ छ । यस विषयमा दोस्रो चरणमा प्राविधिक अध्ययन गरी आवश्यक निर्णय लिइने मन्त्रालयले जनाएको छ।
