काठमाडौं । फेसबुकको सुरक्षा संकटको रुपमा लिइएको पछिल्लो ह्याकमा ४० करोड भन्दा बढी फेसबुक प्रयोगकर्ताका फोन नम्बरसहितको जानकारी अनलाइनमा सार्वजनिक भएका छन्।
जानकारी सार्वजनिक गरिएको सर्भरमा सबैभन्दा बढी अमेरिकाका १३ करोड ३० लाख, भियतनामका ५ करोड र यूकेका १ करोड ८० लाख फेसबुक प्रयोगकर्ताको गोपनीयता सार्वजनिक भएको हो ।
ती जानकारी संकलन गरिएको फेसबुकको डाटाबेसमा ह्याकरहरुले प्रवेश पाएपछि फेसबुक प्रयोगकर्ताका फोन नम्बर सार्वजनिक भएका हुन्।सो डाटाबेस भएको सर्भरमा पासवर्ड नराखिएकाले जो कसैले पनि उक्त जानकारी हेर्न सक्छन्। कतिपय प्रयोगकर्ताका भौगोलिक स्थान (देश) पनि सार्वजनिक भएको छ ।
फेसबुकका प्रवक्ताले भनेका छन्, त्यो डाटाबेस हामीले हटाइसकेका छौँ, फेसबुकका प्रयोगकर्ताको अकाउन्ट ह्याक भएको हामीले पाएनौँ।
प्रयोगकर्ताका फोन नम्बर सार्वजनिक हुँदा ती नम्बरमा अनावश्यक फोन आउने, फेसबुकको पासवर्ड परिवर्तन हुन सक्ने जस्ता खतराहरु देखिन्छ ।
