काठमाडौँ। राष्ट्रिय सभामा नेपाली कम्युनिष्ट पार्टीका संसदीय दलका नेता झक्कुप्रसाद सुवेदीले भदौ १० गते रसुवागढीको टिमुरे नाकामा आएको बाढीबाट भएको अकल्पनीय जनधनको क्षतिप्रति गहिरो दुःख व्यक्त गर्दै प्रभावकारी उद्धार, राहत र पुनस्र्थापनाका लागि सरकारको ध्यानाकर्षण गराउनुभएको छ ।
बुधवारको राष्ट्रिय सभा बैठकमा बोल्दै नेता सुवेदीले उक्त बाढीलाई इतिहासकै क्रूर र हृदयविदारक घटनाको रूपमा चित्रण गर्नुभयो ।
सो विपद्मा थुप्रै नागरिकले ज्यान गुमाएको उल्लेख गर्दै उहाँले मृतकप्रति श्रद्धाञ्जली र शोक सन्तप्त परिवारजनमा समवेदना प्रकट गर्नुभयो ।
बाढीले रसुवा, नुवाकोट, धादिङ, गोरखा, चितवनलगायत झन्डै दुई दर्जन जिल्लाका नागरिकलाई प्रभावित पारेको छ । साथै, सो क्षेत्रमा रहेका चीन, भारतसहित विभिन्न देशका सयौँ पर्यटकहरू समेत बेपत्ता भएको उहाँले जानकारी दिनुभयो ।
हालै चीनमा सम्पन्न अन्तर–व्यवस्थापिका संघ (आईपीयू) को सेमिनारमा सहभागी भई फर्किनुभएका नेता सुवेदीले जलवायु परिवर्तनका कारण धनी र विकसित मुलुकहरूले प्रकृतिमाथि गरेको दोहनको परिणाम नेपालजस्ता मुलुकले भोग्नुपरिरहेको विषय आफूहरूले अन्तर्राष्ट्रिय मञ्चमा दृढतापूर्वक उठाएको बताउनु भयो ।
उद्धार कार्यमा देखिएका कमजोरीहरूबारे चर्चा गर्दै सुवेदीले भन्नुभयो, ‘नेपाली सेना, नेपाल प्रहरी र सशस्त्र प्रहरीले आफ्नो सामथ्र्य अनुसार काम गरिरहेका छन् तर कतिपय स्थानमा अझै पनि उद्धारमा ढिलाइ भइरहेको छ । सुरक्षा निकायहरू स्रोतसाधनविहीन अवस्थामा छन् ।
गृहमन्त्रीले सुरुङ खन्ने जस्ता प्राविधिक काममा अल्झिनुभन्दा सुरक्षा निकायसँग समन्वय गर्ने, विदेशी सङ्घसंस्थासँग सहकार्य गर्ने र राहत सामग्री वितरणलाई प्रभावकारी बनाउन केन्द्रित हुनुपर्छ ।’
उहाँले सुत्केरी, महिला, ज्येष्ठ नागरिक र अपाङ्गता भएका व्यक्तिहरूलाई विशेष प्राथमिकतामा राखेर व्यवस्थापन गर्न सरकारसँग माग गर्नुभयो ।
सरकारको आलोचना गर्दै उहाँले सरकार सामाजिक सञ्जाल र समाचारमा बढी सक्रिय देखिए पनि कार्यक्षेत्र (फिल्ड) मा उपस्थिति कमजोर रहेको टिप्पणी गर्नुभयो ।
सङ्घीय सरकारले प्रदेश र स्थानीय सरकारलाई गर्ने व्यवहारमा विभेद गर्न नहुने भन्दै उहाँले तीनै तहका सरकारबीच उचित समन्वय हुनुपर्नेमा जोड दिनुभयो ।
यो महाविपत्तिलाई दलगत स्वार्थभन्दा माथि उठेर सामना गर्नुपर्ने बताउँदै उहाँले राष्ट्रिय एकता कायम गरी अगाडि बढ्न सरकार र सबै राजनीतिक दलहरूलाई अपिल गर्नुभयो ।–न्युज एजेन्सी नेपाल
