काठमाडौं । कृषि, वन तथा पर्यावरण मन्त्री गिता चौधरीको पहलमा भोटेकोशी तथा त्रिशूली नदीमा आएको बाढीबाट प्रभावित रसुवा र नुवाकोटका नागरिकका लागि ३० टनभन्दा बढी खाद्य सामग्री पठाइएको छ।
विश्व खाद्य कार्यक्रम (डब्लुएफपी) बाट मात्रै २९ टन खाद्य सामग्री प्राप्त भएको जनाइएको छ। उक्त खाद्य सामग्रीसहित ३० टनभन्दा बढी राहत सामग्री सवारीसाधनमार्फत रसुवा र नुवाकोटतर्फ पठाइएको हो।
विपद्बाट प्रभावित नागरिकलाई तत्काल खाद्य सहायता उपलब्ध गराउने उद्देश्यले राहत सामग्री प्रभावित क्षेत्रमै पठाइएको बताइएको छ। बाढी प्रभावित क्षेत्रमा खाद्यान्न तथा अन्य अत्यावश्यक सामग्रीको आपूर्ति र व्यवस्थापनलाई प्राथमिकताका साथ अघि बढाइएको मन्त्री चौधरीको सचिवालयले जनाएको छ।
बाढीबाट प्रभावित नागरिकको तत्कालीन आवश्यकता सम्बोधन गर्न खाद्य सामग्रीको आपूर्ति तथा वितरणलाई थप व्यवस्थित बनाउने तयारीसमेत भइरहेको जनाइएको छ।
