काठमाडौं । बाढीका कारण माथिल्लो त्रिशूली–३ ‘ए’ जलविद्युत् आयोजनास्थलमा फसेका मानिसहरूको उद्धार कार्य सरकारले रातभरि नै निरन्तर जारी राखेको छ।
तर, आइतबार बिहान करिब ४ बजे आयोजना क्षेत्रमा पुनः बाढी आएपछि त्रिशूली नदीको जलसतह ५ देखि १० मिटरसम्म बढेको छ। नदीको सतह अत्यधिक बढेपछि आयोजनाको आसपासको किनार तीव्र रूपमा कटान हुन थालेको छ।
बाढीपछि उत्पन्न जोखिमलाई ध्यानमा राख्दै सरकारले आयोजना क्षेत्रको समग्र अवस्थाको पुनः अवलोकन तथा मूल्यांकन गरिरहेको छ। माटो र लेदो हटाउन डोजरसहितका भारी उपकरण पुनः परिचालन गर्ने तयारी गरिएको छ।
यसैबीच, पहिरो र माटोले पुरिएको त्रिशूली–३ ‘ए’ को टनेल पोर्टल तथा पावर हाउस क्षेत्रमा रहेका महत्वपूर्ण उपकरण सुरक्षित रूपमा निकाल्ने तयारी पनि अघि बढाइएको छ।
आयोजना क्षेत्रको पावर हाउस नियन्त्रणसँग सम्बन्धित १९ वटा सीसीटीभी क्यामेरा, एचडीआर र सेटअप बक्सलगायतका उपकरण निकाल्न हेलिकप्टरमार्फत ‘स्पेशल फोर्स’ परिचालन गर्ने तयारी गरिएको छ।
सडक पहुँच अवरुद्ध भएकाले पुरिएको भवननजिकै हेलिकप्टरबाट टोली उतारेर ती महत्वपूर्ण उपकरण सुरक्षित रूपमा निकाल्ने योजना बनाइएको हो।
