काठमाडौं। भदौ १० गते आएको बाढीपहिरोका कारण रसुवा, धादिङ, नुवाकोट र चितवन जिल्लाका विभिन्न स्थानमा सञ्चालित दूरसञ्चार सेवा प्रभावित भएपछि नेपाल टेलिकमले सेवा पुनःस्थापनाका लागि आवश्यक मर्मतसम्भार तथा प्राविधिक कार्यलाई तीव्रता दिएको छ।
नेपाल टेलिकमले रसुवाका न्यौपानेचौर र राम्चे रिपिटर साइटमा हेलिकोप्टरमार्फत जेनेरेटर, ब्याट्रीलगायत आवश्यक उपकरण पठाएर सेवा सञ्चालनमा ल्याएको जनाएको छ। ती साइटबाट न्यौपानेचौर तथा राम्चे आसपासका केस्पाङ (काउले), ठुलेगाउँ, तादी, फिकुरी, कालिकास्थान, ग्राङ, डाँडागाउँ, मैलुङ, पाङसाङ डाँडा, लाङटाङ र क्याङ्जिनलगायतका क्षेत्रमा सेवा सुचारु गरिएको छ।
त्यस्तै, धुन्चेमा सेवा सञ्चालनका लागि जेनेरेटर, इन्धन तथा कर्मचारी परिचालन गरिएको छ। नुवाकोटको मदनपुर, बट्टार, विदुर बसपार्क तथा धादिङको बैरेनी–ठमेल डाँडामा पनि जेनेरेटर, इन्धनसहित प्राविधिक कर्मचारी परिचालन गरी सेवा सुचारु गर्ने कार्य भइरहेको नेपाल टेलिकमले जनाएको छ।
प्रभावित क्षेत्रका प्राथमिकताप्राप्त साइटलाई निरन्तर सञ्चालनमा ल्याउन जेनेरेटर, इन्धन तथा कर्मचारी परिचालन गरिएको छ। साथै, सञ्चालनमा रहेका अन्य बीटीएसको कभरेज र क्षमता विकास तथा अप्टिमाइजेसन गरी सेवा थप प्रभावकारी बनाउने कामसमेत भइरहेको छ।
नेपाल टेलिकमका अनुसार चितवनका ५ मध्ये ३, धादिङका ३६ मध्ये १३, नुवाकोटका ७९ मध्ये ३१ र रसुवाका ३२ मध्ये १३ साइट सञ्चालनमा आएका छन्। बाढीपहिरोबाट प्रभावित भएका कुल १५२ साइटमध्ये ६० साइट अझै सञ्चालनमा आउन बाँकी छन्। ती साइटलाई समेत यथाशीघ्र सञ्चालनमा ल्याउन आवश्यक प्राविधिक कार्य भइरहेको टेलिकमले जनाएको छ।
विपद्को अवस्थामा नागरिकको सञ्चार आवश्यकतालाई सहज बनाउन सेवा निरन्तरता, पूर्वसूचना तथा सचेतना र आवश्यक प्राविधिक कार्यलाई उच्च प्राथमिकतामा राखिएको नेपाल टेलिकमले जनाएको छ। सेवा पुनःस्थापनाले प्रभावित क्षेत्रका नागरिकलाई आफन्तजनसँग सञ्चार सम्पर्क कायम गर्न सहयोग पुग्ने कम्पनीको विश्वास छ।
