काठमाडौं । बुधबार बिहान रसुवामा आएको बाढीका कारण विभिन्न बैंकमा कार्यरत २६ जना कर्मचारी सम्पर्कविहीन भएको नेपाल बैंकर्स संघले जनाएको छ।
संघका अनुसार प्रभु बैंक, हिमालयन बैंक, ग्लोबल आइएमई बैंक, सानिमा बैंक, नेपाल इन्भेस्टमेन्ट मेगा बैंक, लक्ष्मी सनराइज बैंक, एनएमबी बैंक र माछापुच्छ्रे बैंकका कर्मचारी सम्पर्कविहीन भएका हुन्।
बाढीबाट भोटेकोसी नदी किनार आसपासका टिमुरे, स्याफ्रुबेँसी र बेत्रावती बजारमा रहेका बैंकका शाखासमेत प्रभावित भएको तथा केही शाखा बाढीले बगाएको प्रारम्भिक जानकारी प्राप्त भएको संघले जनाएको छ।
यद्यपि, बाढीका कारण बैंकका शाखा तथा कर्मचारीमा भएको क्षतिको विस्तृत विवरण भने अझै प्राप्त हुन बाँकी रहेको संघले जनाएको छ। घटनाको थप विवरण संकलन तथा सम्पर्कविहीन कर्मचारीको अवस्थाबारे जानकारी लिने काम भइरहेको छ।
