काठमाडौं । पूर्वराष्ट्रपति विद्यादेवी भण्डारीले रसुवातर्फ तिब्बतबाट भोटेकोसी नदीमा ठूलो बाढी प्रवेश गरेको खबरले आफू मर्माहत भएको बताउँदै तल्लो तटीय क्षेत्रमा उच्च सतर्कता अपनाउन आग्रह गरेकी छन्।
पूर्वराष्ट्रपति भण्डारीले सामाजिक सञ्जालमार्फत अर्को सूचना नआएसम्म त्रिशूली नदीको तटीय क्षेत्र, विशेषगरी मुग्लिनसम्म, उच्च सतर्कता अपनाउँदै सुरक्षित स्थानमा रहन सबैमा अनुरोध गरेकी हुन्।
उनले सम्भावित जोखिमबाट जोगिन नदी तथा खोलाको किनार, तल्लो तटीय क्षेत्र र जोखिमयुक्त स्थानमा नजान तथा आवश्यक सावधानी अपनाउन आग्रह गरेकी छन्।
बाढीबाट प्रभावित क्षेत्रमा उद्धार तथा राहतका लागि नेपाल सरकार, सुरक्षा निकाय, स्थानीय तह, सम्बन्धित निकाय तथा आम नागरिकलाई सुरक्षित रहँदै आवश्यक सहयोग र समन्वय गर्न पनि पूर्वराष्ट्रपति भण्डारीले आह्वान गरेकी छन्।
‘सबैको सुरक्षा र जीवनरक्षालाई पहिलो प्राथमिकतामा राखौँ । सतर्क रहौँ, सुरक्षित रहौँ,’ भण्डारीले भनेकी छन्।
