काठमाडौं । राष्ट्रिय स्वतन्त्र पार्टी (रास्वपा) का सांसद खगेन्द्र सुनारले निश्चित विचौलियाहरूले प्रहरी प्रधान कार्यालय नै कब्जा गरेको आरोप लगाउनुभएको छ ।
बिहीवार बसेको सार्वजनिक लेखा समितिको बैठकमा बोल्दै सांसद सुनारले प्रहरीको स्रोत–साधन खरिद प्रक्रियामा अनियमितता भइरहेको दाबी गर्दै यस्तो आरोप लगाउनुभएको हो । उहाँले समितिले प्रहरीको स्रोत–साधन खरिदमा भएका भनिएका अनियमिततासम्बन्धी माग गरेका कागजात उपलब्ध भए–नभएकोबारे जानकारी गराउन समितिका सभापतिलाई आग्रह गर्नुभयो ।
समितिको यसअघिको बैठकले प्रहरीको स्रोत–साधन खरिदसम्बन्धी कागजात १५ दिनभित्र उपलब्ध गराउन प्रहरीलाई निर्देशन दिएको थियो । तर, त्यसको जवाफ नआउँदै प्रहरीले करोडौँ रुपैयाँका टेण्डर आह्वान गरेको भन्दै सांसद सुनारले खरिद प्रक्रियामाथि प्रश्न उठाउनुभयो ।
उहाँले यसअघि समितिमा उठाएका प्रश्नमा आफू अडिग रहेको बताउँदै आफ्नो अभिव्यक्तिबाट कसैको मानमर्दन भएको भए अदालत जान चुनौती दिनुभयो । आफूले उठाएका प्रश्नको जवाफ दिन र कानुनी प्रक्रियाको सामना गर्न आफू तयार रहेको उहाँको भनाइ थियो ।
सुनारले भन्नुभयो, “हामीले १५ दिनभित्रमा प्रहरीको स्रोत–साधन खरिदमा भएका बदमासीका बारेमा डकुमेन्ट मागेका थियौँ, त्यो आयो कि आएन ? फेरि अझै बीचमा प्रहरीले करोडौँको टेण्डर आह्वान गरेको छ । निश्चित विचौलियाहरूले प्रहरीको हेडक्वार्टर कब्जा गरेका छन् ।”
उहाँले सार्वजनिक लेखा समितिमा सांसदहरूबीच हुने बहस र व्यवहारप्रति पनि आपत्ति जनाउनुभयो । कुनै विषय नियमावलीविपरीत भए समितिका सभापतिले तत्काल रुलिङ गर्नुपर्ने भन्दै एक सांसदले अर्को सांसदलाई धम्क्याउने, घेराबन्दी गर्ने वा हतोत्साहित गर्ने कार्य स्वीकार्य नहुने बताउनुभयो ।
जनताबाट निर्वाचित प्रत्येक सांसदले समितिमा आफ्ना प्रश्न राख्ने सार्वभौम अधिकार राख्ने उहाँको भनाइ थियो । भ्रष्टाचारको गहिराइसम्म पुग्न सामान्य ढंगले प्रश्न गरेर सम्भव नहुने भन्दै सुनारले समितिमा उठाइने प्रश्न निर्मम, गम्भीर र गहिरो हुनुपर्ने बताउनुभयो ।
“एउटा सांसदले अर्को सांसदलाई हतोत्साहित गर्ने, धम्क्याउने, घेराबन्दी गर्ने काम मान्य छैन । बोल्दै गरेको वक्ता पनि त्यहीँ निर्वाचित सांसद हो, जो जनताबाट अनुमोदित भएर आएको मान्छे हो । यहाँ प्रत्येक सांसद सार्वभौम छ,” उहाँले भन्नुभयो ।
सुनारले आफू समितिमा रहँदासम्म भ्रष्टाचार र खरिद प्रक्रियासम्बन्धी विषयमा कडा प्रश्न उठाइरहने बताउनुभयो । आफ्नो प्रश्न गर्ने शैलीप्रति असन्तुष्टि भए सभापतिले समितिबाट हटाउन सक्ने भन्दै आफू त्यसका लागि पनि तयार रहेको उहाँको भनाइ थियो ।
“पहिलेको शैलीमा भ्रष्टाचारको छानबिन हुँदैन । प्रश्न निर्मम हुन्छ, गम्भीर हुन्छ, गहिरो हुन्छ, तल्लैबाट हुन्छ,” उहाँले भन्नुभयो ।
उहाँले अनियमितता र भ्रष्टाचारविरुद्ध सार्वजनिक लेखा समिति निर्मम रूपमा प्रस्तुत हुनुपर्नेमा जोड दिनुभयो ।
यसअघि सार्वजनिक लेखा समितिको बैठकमा सांसद सुनार र प्रहरी महानिरीक्षक दानबहादुर कार्कीबीच प्रहरीको पोशाक खरिद प्रक्रियामा अनियमितता भएको विषयमा विवाद भएको थियो । सोही विषयमा सांसद सुनारले बिहीवारको बैठकमा आफ्नो धारणा राख्दै आफूले उठाएका प्रश्नमा कुनै कमजोरी नरहेको दाबी गर्नुभएको हो ।
