काठमाडौं । राष्ट्रिय स्वतन्त्र पार्टी (रास्वपा)की सांसद ललिता कुमारीले बालबालिकामा बढ्दो मोबाइल लत नियन्त्रणका लागि अभिभावकलाई लक्षित गरी सचेतनामूलक कार्यक्रम सञ्चालन गर्न सरकारसँग माग गर्नुभएको छ ।
प्रतिनिधि सभाको बुधबारको बैठकमा बोल्दै सांसद कुमारीले बालबालिका रोए, हाँसे वा खाना खुवाउने क्रममा मोबाइल दिने प्रवृत्ति बढ्दै गएको भन्दै यसले बालबालिकाको बालापन नै स्क्रिनको जिम्मामा पुगेको बताउनुभयो ।
उहाँले बालबालिकाको संवेदनशील अवस्थासमेत भिडियो बनाएर सामाजिक सञ्जालमा राख्ने तथा भ्युजका लागि उनीहरूलाई बनावटी व्यवहार सिकाउने प्रवृत्ति बढेकोप्रति चिन्ता व्यक्त गर्नुभयो ।
“बच्चा रोयो भने मोबाइल, खाना खुवाउन मोबाइल, हामी व्यस्त भयौँ मोबाइल । बच्चा हाँसे पनि मोबाइल र रोए पनि मोबाइल दिने कुरा कस्तो हो ?” उहाँले प्रश्न गर्नुभयो ।
अत्यधिक स्क्रिन टाइमले बालबालिकामा विकाससम्बन्धी समस्या देखिन सक्ने उल्लेख गर्दै उहाँले मोबाइलको बढ्दो प्रयोग नियन्त्रण गर्न अभिभावकलाई सचेत गराउनुपर्नेमा जोड दिनुभयो ।
“हामीले बच्चाको बालापनलाई स्क्रिनको जिम्मा लगाएका छौँ । मोबाइलको लतले बाल्यकाल खोस्न सक्छ, जुन गुम्यो भने कहिल्यै फर्किँदैन,” उहाँले भन्नुभयो ।
सांसद कुमारीले सामाजिक सञ्जालमा भ्युजका लागि बालबालिकाको प्राकृतिक व्यवहारभन्दा बनावटी व्यवहारलाई प्रोत्साहन गर्ने प्रवृत्ति रोक्नुपर्ने बताउनुभयो । उहाँले बालबालिकाको विकास र मानसिक स्वास्थ्यमा पर्न सक्ने असरलाई ध्यानमा राख्दै अभिभावकलाई लक्षित विशेष सचेतनामूलक कार्यक्रम सञ्चालन गर्न सरकारसँग आग्रह गर्नुभयो ।
पछिल्लो समय स्मार्टफोन तथा डिजिटल उपकरणको अत्यधिक प्रयोग विश्वव्यापी रूपमा बढिरहेको छ । यसको असन्तुलित प्रयोगले बालबालिकाको दैनिक व्यवहार, अध्ययन, निद्रा, शारीरिक सक्रियता तथा सामाजिक अन्तरक्रियामा असर पार्न सक्ने भन्दै अभिभावकको निगरानी र उचित डिजिटल बानी विकासमा जोड दिइँदै आएको छ ।
