भरतपुर । चितवनलाई डेंगुले आक्रान्त बनाएको छ । जिल्लामा बुधबारसम्म ४ हजार ४ सय ४५ जनाको रगत परीक्षण गरिएको छ भने १ हजार ४ सय ६० जनामा डेंगुको संक्रमण भेटिएको छ । जिल्लाका सबै जसो अस्पतालमा थेगी नसक्नु ज्वरोका बिरामी छन् ।

सरकारी अस्पताल भरतपुर अस्पतालमा बिरामीको चाप अत्यधिक बढेपछि मंगलबारदेखि ज्वरो क्लिनिक नै सुरु गरिएको छ । रोग लागेपछिको उपचार सेवामा जति चासो अस्पतालले दिएको छ रोग लाग्न नदिने उपायमा भने अस्पताल आफैं चुकेको देखिन्छ ।

डेंगु गराउने इडिस इजिप्टाई जातको पोथी लामखुट्टे जमेको सफा पानीमा बस्न रुचाउँछ । एडिस एजिप्टाई लामखट्टे कालो रंगको हुन्छ, जसमा सेतो थोप्लो पनि देखिन्छ । डेंगु सार्ने लामखुट्टेले थुप्रै दिनदेखि हलचल नभएको स्वच्छ पानीमा फूल पार्छ । डेंगु नियन्त्रण गर्न फूल पार्न दिनु हुँदैन ।

डेंगु लागेपछि उपचार गराउन सबैभन्दा धेरै बिरामी आउने भरतपुर अस्पताल भने आफैं लामखुट्टे पाल्दै आएको छ । अस्पतालको आईसीयू ब्लक पछाडिको क्षेत्रमा डेंगु रोग सार्ने लामखुट्टेका लार्भा तथा प्युपा हुर्कने थलो बनेको छ । अस्पतालको फोहोर व्यवस्थापन गर्न बनाउन लागिएको सेग्रगेसन प्लान्ट निर्माण स्थल नै डेंगु उत्पादन हुने अवस्थामा छ । अस्पतालको यो क्षेत्रमा अस्पतालजन्य फोहोर असरल्ल फालिएका छन् । अस्पतालभित्र फोहोर

छुट्याएर राखिए पनि बाहिर खुला आकाशमुनि एकै ठाउँमा फाल्ने गरिएको छ । अस्पतालमा हालसम्म फोहोर व्यवस्थापनका लागि कुनै प्रविधि नभएकाले संकलन गरी थुपार्ने र महानगरको फोहोर संकलन गर्ने गाडीलाई जिम्मा लगाउने गरेको छ ।

डेंगुबाट जोगिनका लागि एक मात्र सर्त भनेको लामखुट्टेको टोकाइबाट जोगिनु हो । त्यसका लागि सरसफाइ अत्यावश्यक छ । डेंगु नियन्त्रण गर्न डेंगु गराउने लामखुट्टेको लार्भा र प्युपा खोजी नष्ट गर्नुको विकल्प छैन । भरतपुर महानगर, जिल्ला स्वास्थ्य कार्यालय तथा प्रदेश स्तरीय कार्यक्रममार्फत् थुप्रै पटक खोज र नष्ट गर अभियान सञ्चालन भइरहे पनि आडैमा रहेको भरतपुर अस्पतालमा अभियान पुगेकै छैन । सानो भाँडा, प्लास्टिकका बोतल, बिर्कोमा रहेको पानीका बारेमा जिज्ञासा राख्दा अस्पतालका सूचना अधिकारी लीलाधर पौडेलले निर्माण प्रक्रिया चलिरहेको सो क्षेत्रमा पानी जमेको हुन सक्ने बताए ।

अस्पतालमा एक सयभन्दा बढी सरसफाइकर्मी छन् । उनीहरूलाई परिचालन गरेर अस्पताल परिसरकै खाल्डाखुल्डी पुर्न, पानी जम्न नदिन अस्पतालले ध्यान दिएको देखिँदैन । नेपालमा सन् २००४ मा पहिलो पटक डेंगु देखिएको थियो । विदेशी नागरिकमा देखिएको डेंगुको प्रमाणीकरण चितवनमा भएको हो  ।, समाचार कान्तिपुर दैनिकमा प्रकाशित छ ।