काठमाडौं । राष्ट्रिय स्वतन्त्र पार्टी (रास्वपा)ले भदौ ५ गते दोस्रो केन्द्रीय समिति बैठक बोलाएको छ। सभापति रवि लामिछानेले बोलाएको बैठकमा पार्टीका बाँकी पदाधिकारी तथा केन्द्रीय सदस्य मनोनयनको प्रस्ताव अघि बढाउने तयारी गरिएको छ।
रास्वपाका एक नेताका अनुसार बैठकमा केही पदाधिकारी, सचिवालय सदस्य र केन्द्रीय सदस्य मनोनयन गरी अनुमोदनका लागि प्रस्ताव पेश गर्ने तयारी छ। बैठकका लागि केन्द्रीय सदस्यहरूलाई सूचना पठाइसकिएको छ।
रास्वपामा हाल एक उपसभापति, एक महामन्त्री, एक सहमहामन्त्री, एक प्रवक्ता, तीन सहप्रवक्ता, एक कोषाध्यक्ष र दुई सहकोषाध्यक्षको पदमा मनोनयन हुन बाँकी छ। त्यस्तै, २७ जना सचिवालय सदस्य र ५१ जना केन्द्रीय सदस्य पनि मनोनयन गर्न बाँकी रहेको छ।
यसअघि साउन १३ गते बसेको पहिलो केन्द्रीय समिति बैठकले पाँच जना पदाधिकारीलाई सचिवालय सदस्य बनाउने निर्णय गरेको थियो। सोही बैठकमा सभापति लामिछानेले प्रधानमन्त्री वालेन्द्र शाहलाई पार्टीको वरिष्ठ नेता बनाउने प्रस्ताव गरेका थिए। उक्त प्रस्ताव बैठकबाट सर्वसम्मत रूपमा पारित भएको थियो।
भदौ ५ को बैठकबाट रास्वपाको संगठनात्मक संरचनालाई थप पूर्णता दिने तयारी गरिएको नेताहरूले बताएका छन्।
