काठमाडाैँ । सुदूरपश्चिम प्रदेशको नयाँ मुख्यमन्त्रीमा नेपाली कम्युनिस्ट पार्टी (नेकपा) का खगराज भट्ट नियुक्त भएका छन् ।
प्रदेश प्रमुख नजिर मियाँले संविधानको धारा १६८ को उपधारा (२) बमोजिम भट्टलाई मुख्यमन्त्रीमा नियुक्त गरेका हुन् । भट्टले शुक्रबार बिहान नेकपा एमालेको समर्थनसहित नयाँ सरकार गठनका लागि प्रदेश प्रमुखसमक्ष दाबी पेस गरेका थिए ।
यसअघि मुख्यमन्त्री कमलबहादुर शाहले पदबाट राजीनामा दिएपछि प्रदेश प्रमुख मियाँले नयाँ सरकार गठनका लागि दाबी पेस गर्न आह्वान गरेका थिए । उनले शुक्रबार बिहान ११ बजेसम्मको समयसीमा तोकेका थिए ।
तोकिएको समयभित्रै भट्टले एमालेको समर्थनमा बहुमत जुटाएर मुख्यमन्त्रीमा दाबी पेस गरेका थिए । दाबी पेस गरेको केही समयमै प्रदेश प्रमुख मियाँले उनलाई मुख्यमन्त्री नियुक्त गरेका हुन् ।
नेकपाका एक सांसदका अनुसार नवनियुक्त मुख्यमन्त्री भट्टले शुक्रबार दिउँसो ३ बजे पद तथा गोपनीयताको शपथ लिने कार्यक्रम तय गरिएको छ ।
मुख्यमन्त्रीमा नियुक्त भएसँगै भट्टले शुक्रबार नै सानो आकारको मन्त्रिपरिषद् गठन गर्ने तयारीसमेत गरेको नेताहरूले बताएका छन् ।
