काठमाडौं । वरिष्ठ पत्रकार किशोर श्रेष्ठलाई प्रहरीले वैयक्तिक गोपनीयतासम्बन्धी कसुरमा पक्राउ गरेको तथा त्यसपछि उनले सम्पादन गर्दै आएको ‘जनआस्था’ पत्रिकाको कार्यालयमा छापा मारेर कम्प्युटरसहित विभिन्न सामग्री नियन्त्रणमा लिएको घटनाप्रति मानव अधिकार तथा शान्ति समाजले आपत्ति जनाएको छ ।
शान्ति समाजले बिहीबार प्रेस विज्ञप्ति जारी गर्दै प्रेसबाट कुनै त्रुटि भए त्यसको निरूपणका लागि नियामक निकायमार्फत कानुनी विधि हुँदाहुँदै पत्रकारलाई गिरफ्तार गर्नु आपत्तिजनक भएको जनाएको हो ।
समाजका अनुसार श्रेष्ठलाई २०८३ साउन २७ गते राति पक्राउ गरिएको थियो । त्यसको भोलिपल्ट साउन २८ गते बिहान ‘जनआस्था’को कार्यालयमा प्रहरीले छापा मारेर कम्प्युटरसहित विभिन्न सामग्री नियन्त्रणमा लिनु निन्दनीय र दुराशयपूर्ण देखिएको विज्ञप्तिमा उल्लेख छ ।
यस्तो कार्यले प्रेस स्वतन्त्रता, मौलिक हक तथा नेपालको संविधानको उल्लङ्घन गरेको समाजको ठहर छ । समाजले पत्रकार श्रेष्ठलाई शीघ्र रिहा गर्न तथा प्रेसमाथिको आक्रमण बन्द गर्न सरकारसँग आग्रह गरेको छ ।
समाजले नेपालको संविधानको प्रस्तावनामै पूर्ण प्रेस स्वतन्त्रताको सुनिश्चितता गरिएको र संविधानको धारा १९ ले सञ्चारको हकलाई मौलिक हकका रूपमा प्रत्याभूत गरेको स्मरण गराएको छ । धारा १९ को उपधारा २ मा सञ्चारमाध्यमलाई बन्द, जफत वा दर्ता खारेज गर्न तथा त्यस्ता सामग्री जफत गर्न नहुने व्यवस्था रहेको समाजले जनाएको छ ।
त्यसैगरी, नेपाल पक्ष राष्ट्र रहेको नागरिक तथा राजनीतिक अधिकारसम्बन्धी अन्तर्राष्ट्रिय प्रतिज्ञापत्रको धारा १९ ले पनि अभिव्यक्ति तथा सञ्चारको स्वतन्त्रतालाई सुनिश्चित गरेको समाजले उल्लेख गरेको छ ।
पत्रकारको सुरक्षाका लागि सूचनाको स्रोत खुलाउन सञ्चारकर्मी बाध्य नहुने पत्रकारिताको विशेषाधिकारसम्बन्धी अन्तर्राष्ट्रिय मान्यतालाई समेत सबैले अवलम्बन गर्नुपर्ने समाजको भनाइ छ ।
