काठमाडाैँ । अविरल वर्षापछि आएको पहिरोमा परी रोल्पाको थबाङ गाउँपालिका–५, बोटलबारामा मृत्यु हुनेको संख्या तीन पुगेको छ। पहिरोले स्थानीय कमलबहादुर पुन मगरको घरसहित करिब ६ वटा घर तथा गोठ पुरेको छ।
बुधबार राति माथिबाट खसेको पहिरोमा परी १८ वर्षीया शान्ती पुन मगर र ६० वर्षीय कमलबहादुर पुन मगरको मृत्यु भएको थियो। उद्धारका क्रममा बिहीबार बिहान थप ७१ वर्षीया मनरखी पुन मगरको शव फेला परेको जिल्ला प्रहरी कार्यालय रोल्पाले जनाएको छ।
पहिरोमा परी दुई जना गम्भीर घाइते भएका छन्। उद्धार गरिएका २२ वर्षीय हिमाल पुन मगर र २५ वर्षीय सञ्जय घर्ती मगरको अवस्था गम्भीर रहेको प्रहरीले जनाएको छ। उनीहरूलाई थप उपचारका लागि पठाउने तयारी भइरहेको छ।
प्रहरीका अनुसार घटनास्थलमा अझै नौ जना बेपत्ता छन्। बेपत्ता हुनेमा जुनकुमारी पुन मगर, ९ वर्षीय अशिम पुन मगर, ६ वर्षीय अशोक पुन मगर, ७५ वर्षीय डलबहादुर पुन मगर, ८० वर्षीय अजम्बर पुन मगर, ७८ वर्षीय बलबहादुर पुन मगर, ७२ वर्षीय लिलबहादुर पुन मगर, ७१ वर्षीया मनि पुन मगर र ६७ वर्षीया हस्तकला रोका मगर रहेका छन्।
घटनापछि बिहीबार बिहानैदेखि ठूलो संख्यामा सुरक्षाकर्मी तथा उद्धार टोली परिचालन गरिएको छ। प्रमुख जिल्ला अधिकारीको समन्वयमा जिल्ला प्रहरी कार्यालय रोल्पाबाट प्रहरी नायब उपरीक्षक पञ्चकुमार बाखुको कमान्डमा उद्धार टोली घटनास्थलमा खटिएको छ।
उद्धारका लागि आवश्यक विपद् व्यवस्थापन सामग्रीसहित टोली परिचालन गरिएको प्रहरीले जनाएको छ। बेपत्ताको खोजी तथा उद्धार कार्य जारी रहेकाले मृतक तथा बेपत्ताको संख्या थपिन सक्ने प्रहरीले जनाएको छ।
