चितवन । चितवन मेडिकल कलेज परिसरस्थित फ्राइन्डस रेष्ट्रोले ग्यासको अभावका कारण खाना पकाउन समस्या भएका विद्यार्थी, कर्मचारी, मजदुरलगायतलाई सहुलियत दरमा खाना खुवाउन थालेको छ ।
रेष्ट्रोले यसअघि १५० रुपैयाँमा उपलब्ध गराउँदै आएको सादा खाना अहिले ग्यास अभावका कारण समस्यामा परेकालाई १०० रुपैयाँमै उपलब्ध गराउन थालेको सञ्चालक कृष्णप्रसाद ढकालले जानकारी दिनुभयो ।
एक सिलिन्डर मात्र भएका उपभोक्ताले ग्यास सकिएपछि तत्काल पुनः भर्न नपाउँदा समस्या भोग्नुपरेको भन्दै त्यस्ता नागरिकलाई लक्षित गरी तत्कालको समस्या समाधानमा सहयोग पुगोस् भन्ने उद्देश्यले सहुलियतमा खाना खुवाउन थालिएको ढकालले बताउनुभयो ।
यसैबीच, ग्यासको अभावलाई व्यवस्थापन गर्न चितवन प्रशासनले अत्यावश्यक उपभोक्तालाई वडामा नाम टिपाउन आग्रह गरेको छ । प्रमुख जिल्ला अधिकारी गणेश अर्यालका अनुसार प्रशासनले ‘क्लस्टर बेस’मा दैनिक ग्यास बिक्रीको व्यवस्था मिलाएको छ ।
प्रशासनका अनुसार दैनिक करिब आठ हजार सिलिन्डर ग्यास क्लस्टरका आधारमा बिक्री भइरहेको छ । प्रशासनले उपलब्ध गराएको टोल फ्री नम्बरमा फोन गरेर हालसम्म ९९८ जनाले ग्यास लगिसकेका छन् ।
प्रमुख जिल्ला अधिकारी अर्यालले आगामी शुक्रबारदेखि केन्द्रीय बसपार्कबाट समेत क्लस्टरका आधारमा ग्यास बिक्री गर्ने व्यवस्था मिलाइने जानकारी दिनुभयो । ग्यास अभावका कारण खाना पकाउन समस्या भोगिरहेका उपभोक्तालाई लक्षित गर्दै प्रशासनले वितरण प्रणालीलाई थप व्यवस्थित बनाउने तयारी गरेको उहाँले बताउनुभयो ।
