काठमाडाैँ । बाजुराको बडीमालिका र अछामको रामारोशन क्षेत्रलाई जोडेर ‘बडीमालिका–रामारोशन वन संरक्षण क्षेत्र’ घोषणा गरिएको छ। सुदूरपश्चिम प्रदेश सरकारले दुई जिल्लाका महत्वपूर्ण वन तथा प्राकृतिक क्षेत्रलाई एउटै संरक्षण भूगोलमा समेट्दै संरक्षण क्षेत्र घोषणा गरेको हो।
धनगढीमा आयोजित कार्यक्रममा मुख्यमन्त्री कमलबहादुर शाहले प्रदेश मन्त्रिपरिषद्को साउन १९ गतेको निर्णयअनुसार संरक्षण क्षेत्र घोषणा गरिएको जानकारी दिनुभयो। उहाँका अनुसार सुदूरपश्चिम प्रदेश वन ऐन, २०७७ को दफा २६ (१) बमोजिम संरक्षण क्षेत्र घोषणा गरिएको हो।
“दुई जिल्लाका महत्त्वपूर्ण वन तथा प्राकृतिक क्षेत्रलाई एउटै संरक्षण क्षेत्रका रूपमा विकसित गर्ने उद्देश्यले सरकारले निर्णय गरिसकेको छ,” मुख्यमन्त्री शाहले भन्नुभयो। उहाँले बडीमालिका र रामारोशन क्षेत्रको प्राकृतिक सम्पदा, जैविक विविधता तथा वन संरक्षणलाई प्रभावकारी बनाउन प्रदेश सरकार प्रतिबद्ध रहेको बताउनुभयो।
घोषित संरक्षण क्षेत्रमा बाजुराको बडीमालिका नगरपालिका–५, ६, ७ र ८ तथा त्रिवेणी नगरपालिका–५, ६, ७ र ९ का क्षेत्र समेटिएका छन्। यस्तै, अछामको मेल्लेख गाउँपालिका–१ र २ तथा रामारोशन गाउँपालिका–४, ५ र ६ का क्षेत्र समेटिएका छन्। यी क्षेत्र गरी कुल ४९८ दशमलव ४ वर्गकिलोमिटर भूभाग वन संरक्षण क्षेत्रमा समावेश गरिएको छ।
बडीमालिका धार्मिक तथा प्राकृतिक पर्यटनका दृष्टिले महत्वपूर्ण क्षेत्र हो भने रामारोशन प्राकृतिक सौन्दर्य, ताल तथा जैविक विविधताका कारण परिचित छ। दुई क्षेत्रलाई एउटै संरक्षण क्षेत्रमा समेटिएपछि वन तथा प्राकृतिक स्रोतको संरक्षणसँगै पर्यावरणीय पर्यटन प्रवर्द्धनमा समेत सहयोग पुग्ने प्रदेश सरकारको विश्वास छ।
प्रदेश सरकारले संरक्षण क्षेत्रभित्र रहेका वन, वन्यजन्तु, जैविक विविधता तथा प्राकृतिक स्रोतको संरक्षण र व्यवस्थापनसँगै स्थानीय समुदायको सहभागितालाई प्राथमिकता दिने जनाएको छ। दुई जिल्लाका स्थानीय तहबीच संरक्षण तथा पर्यटन विकासमा सहकार्य बढाउनसमेत यो घोषणाले आधार तयार गर्ने अपेक्षा गरिएको छ।
