काठमाडाैँ । कपिलवस्तु नगरपालिकाका पूर्वमेयर तथा नेपाली कांग्रेसका नेता किरण सिंह तिलौराकोट सामुदायिक जंगलमा मृत अवस्थामा फेला परेका छन्।
शुक्रबारदेखि सम्पर्कविहीन भएका ६५ वर्षीय सिंहको शव आइतबार निरन्तर खोजी गर्ने क्रममा जंगलको बीच भागमा फेला परेको जिल्ला प्रहरी कार्यालय कपिलवस्तुले जनाएको छ।
प्रहरीका अनुसार सिंहको खोजीका क्रममा जंगल क्षेत्रमा उनको शव भेटिएको हो। उनी चढेर गएको मोटरसाइकलसमेत जंगलमै रोकिराखेको अवस्थामा फेला परेको प्रहरीले जनाएको छ।
सिंह शुक्रबार दिउँसो करिब २ बजे कपिलवस्तु नगरपालिका–३ स्थित आफ्नो घरबाट निस्किएका थिए। घरबाट निस्किएको करिब डेढ घण्टापछि दिउँसो साढे ३ बजेतिर उनले आफूनिकट केही व्यक्तिलाई फोन गर्दै आफू जंगलमा बाटो बिराएको बताएका थिए।
त्यसपछि आफन्त र स्थानीयको टोलीले उनको खोजी सुरु गरेको थियो। खोजीका क्रममा पूर्व–पश्चिम राजमार्गबाट करिब आठ किलोमिटर भित्र जंगलमा उनले प्रयोग गर्ने लु.प्र.०१–०१३ प ७९७० नम्बरको मोटरसाइकल भेटिएको थियो।
सिंहको मृत्युको कारणबारे भने प्रहरीले अनुसन्धान अघि बढाएको छ। घटनाको थप अनुसन्धान भइरहेको जिल्ला प्रहरी कार्यालय कपिलवस्तुले जनाएको छ।
