काठमाडाैँ । नेपाली काँग्रेस राष्ट्रिय सभा संसदीय दलकी नेता कमला पन्तले मनसुनजन्य विपद् व्यवस्थापन तथा पूर्वतयारीको लागि सरकारको ध्यानाकर्षण गराउनुभएको छ ।
राष्ट्रिय सभाको बिहीवारको बैठकमा ‘मनसुनजन्य विपद् व्यवस्थापनमा सरकारको पूर्वतयारी सम्बन्धमा’ गृहमन्त्रीको ध्यानाकर्षण गराउने प्रश्ताव प्रश्तुत गर्दै उहाँले यस्तो ध्यानाकर्षण गराउनुभएको हो । उहाँले तीनै तहका सरकार तथा सरोकारवाला निकायबीच समन्वय अभावका कारण विपद् व्यवस्थापन प्रभावकारी हुन नसकेको बताउनु भयो ।
उहाँले विपद् जोखिम न्यूनिकरण, प्रतिकार्य र उद्धारका क्षेत्रमा संघ, प्रदेश र स्थानीय तहबीचको समन्वय, सहकार्य तथा एकीकृत कमाण्ड प्रणालीको अभाव प्रत्येक विपद्का बेला दोहोरिने रहेको बताउनु भयो । उहाँले विपद् व्यवस्थापनको जिम्मेवारी स्थानीय तहलाई दिएको भएपनि जोखिम नक्शांकन, सुरक्षित आश्रयस्थल, स्थानीय उद्धार टोली, आवश्यक उपकरण, आपतकालीन कोष तथा राहत सामग्रीको वास्तविक अवस्था सार्वजनिक गर्न नसकिएको बताउनु भयो ।
पन्तले वीपी राजमार्गको काभ्रे–सिन्धुली, पृथ्वी राजमार्गको नारायणगढ–मुग्लिङ, कर्णाली राजमार्गको सुर्खेत–जुम्ला, सिद्धार्थ राजमार्गको पाल्पा–बुटवल खण्ड, तराई–मधेशका डुबान प्रभावित क्षेत्र तथा अन्य उच्च जोखिमयुक्त स्थानका लागि सरकारले के–कस्तो पूर्वतयारी गरिरहेको छ ? भन्ने कुरामा सरकारले कुनै जानकारी सार्वजनिक नगरेको भन्दै आपत्ति जनाउनु भयो । उहाँले सार्वजनिक निकायका पदाधिकारीको पदमुक्तिसम्बन्धी व्यवस्थाका कारण राष्ट्रिय विपद् जोखिम न्यूनीकरण तथा व्यवस्थापन ऐन, २०७४ अनुसार नियुक्त पदाधिकारी पदमुक्त भएपछि विपद् व्यवस्थापनको सर्वोच्च निकाय नेतृत्वविहीन बनेको पनि उल्लेख गर्नुभयो ।
सरकार मनसुनजन्य विपद् प्रतिकार्य र पूर्वतयारीका हिसावले पर्याप्त रूपमा तयार नरहेको भन्दै उहाँले यसतर्फ गृहमन्त्री गुरुङको गम्भीर ध्यानाकर्षण गराउनु भयो ।
