काठमाडाैँ । नेपाली काँग्रेसका नेता एवं राष्ट्रिय सभा सदस्य रञ्जित कर्णले मुलुकको लोकतन्त्र र राष्ट्रियताको रक्षाका लागि पार्टीभित्रको आन्तरिक एकता अपरिहार्य रहेको बताउनुभएको छ ।
बुधवार काठमाडौंको सुकेधारामा आयोजित ‘देश र काँग्रेस जोड्ने अभियानः एकता र सद्भाव विमर्श’ कार्यक्रमलाई सम्बोधन गर्दै उहाँले यस्तो बताउनुभएको हो । नेता कर्णले इतिहासको चर्चा गर्दै नेपाली काँग्रेस कमजोर हुँदा देशको लोकतन्त्र र राष्ट्रियता समेत कमजोर हुने उल्लेख गर्नुभयो ।
पछिल्लो संसदीय निर्वाचनमा कांग्रेस ठूलो दल बन्न नसकेको र वर्तमान सरकारको पाँच महिनाको कार्यशैलीले मुलुकमा लोकतन्त्रमाथि खतरा उत्पन्न हुन थालेको उहाँको भनाइ छ । पार्टी सुदृढीकरणका लागि शुरु गरिएको यो चिन्तन–मन्थन सुकेधारामा मात्र सिमित नभई पार्टी केन्द्रिय कार्यालय सानेपा, चुन्देवी र गाउँ–गाउँमा रहेका भुइँतहका कार्यकर्ता एवं किसानसम्म पु¥याइने उहाँले प्रतिवद्धता व्यक्त गर्नुभयो ।
नेता कर्णले यो अभियानलाई मेची–महाकाली सम्मै लैजाने उद्घोष गर्दै लाखौँ शुभचिन्तक र क्रियाशील सदस्यहरूको दबाब र शुभेच्छाले पार्टीलाई एकीकृत गर्ने विश्वास व्यक्त गर्नुभयो ।
विभिन्न गुट र उपगुटमा रहेका पार्टीका अग्रज नेताहरूलाई एकताको सन्देश आत्मसाथ गर्न आग्रह गर्दै उहाँले यस अभियानले कार्यकर्तामा नयाँ ऊर्जा र बल प्रदान गर्ने दाबी गर्नुभयो । उहाँले इतिहाससँग संवाद गर्दै र वर्तमानलाई आत्मसाथ गर्दै उज्ज्वल भविष्यका लागि गम्भीर संकल्पका साथ अघि बढ्नुपर्नेमा जोड दिनुभयो ।
