काठमाडौं । धनुषाको सबैला नगरपालिका–१२ स्थित एक मन्दिर परिसरमा मृत अवस्थामा फेला परेका अन्दाजी ४० वर्षीय बन्ठु राउत कडेरी मन्दिरका पुजारी नभएको प्रहरीले स्पष्ट पारेको छ।
मधेस प्रदेश प्रहरी कार्यालयका प्रहरी नायब महानिरीक्षक (डिआइजी) ओमप्रसाद अधिकारीले मृतक मन्दिरका पुजारी नभएको पुष्टि गर्दै सामाजिक सञ्जाल तथा केही सञ्चारमाध्यममा फैलिएको पुजारीको मृत्यु सम्बन्धी सूचना सत्य नभएको जानकारी दिनुभयो।
यसैबीच, जिल्ला प्रहरी कार्यालय धनुषाले शुक्रबार विज्ञप्ति जारी गर्दै मृतक मन्दिरका पुजारी नभई विभिन्न स्थानमा घुम्ने र बेलाबेलामा मन्दिरमा आएर बस्ने व्यक्ति रहेको जनाएको छ।
जिल्ला प्रहरी कार्यालय धनुषाका प्रहरी नायब उपरीक्षक मधुसुधन न्यौपानेका अनुसार घटनाको अनुसन्धानका लागि तालिमप्राप्त कुकुरसहितको प्रहरी टोली परिचालन गरिएको छ।
उहाँले भन्नुभयो, “मन्दिर परिसरमा फेला परेको शव कडेरीको हो। उहाँ मन्दिरका पुजारी नभई घुमी हिँड्ने व्यक्ति भएको पुष्टि भएको छ। घटनाको अनुसन्धान जारी छ।”
प्रहरीले घटनालाई कुनै पनि धार्मिक विषयसँग जोडेर अफवाह फैलाउन नहुने आग्रह गरेको छ। प्रारम्भिक अनुसन्धानका आधारमा घटना विशुद्ध आपराधिक प्रकृतिको देखिएको जनाउँदै संलग्न जो–सुकैलाई कानुनी दायरामा ल्याइने प्रतिबद्धता समेत जनाएको छ।
