काठमाडौं । नेपाल कम्युनिष्ट पार्टी (एमाले)का अध्यक्ष केपी शर्मा ओलीले सुनसरीको देवानगञ्ज गाउँपालिकामा उत्पन्न तनावपूर्ण अवस्था, राज्य पक्षबाट भएको बल प्रयोग तथा त्यसक्रममा स्थानीय युवा ओमप्रकाश मेहता र सिरहाका गणेश यादवको गोली लागेर भएको मृत्युको घटनाप्रति गम्भीर चिन्ता व्यक्त गर्नुभएको छ।
सामाजिक सञ्जालमार्फत धारणा सार्वजनिक गर्दै अध्यक्ष ओलीले पछिल्ला घटनामा अन्य नागरिकहरू पनि गम्भीर घाइते भएको उल्लेख गर्दै हिंसात्मक घटनाको क्रम नरोकिई सिरहा लगायतका विभिन्न स्थानमा समेत थप नागरिकको ज्यान गएको खबरले आफू स्तब्ध र मर्माहत भएको बताउनुभएको छ।
उहाँले घटनामा ज्यान गुमाएका सबैप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा समवेदना व्यक्त गर्नुभएको छ भने घाइतेहरूको शीघ्र स्वास्थ्यलाभको कामना गर्नुभएको छ।
अध्यक्ष ओलीले वर्तमान संवेदनशील परिस्थितिमा सबै नागरिक, राजनीतिक दल, नागरिक समाज, सञ्चारकर्मी तथा सरोकारवालालाई संयमता अपनाउन, भ्रामक प्रचारको पछि नलाग्न र सामाजिक सद्भाव तथा राष्ट्रिय एकता कायम राख्न आग्रह गर्नुभएको छ।
उहाँले नागरिकको जिउधनको सुरक्षा गर्नु तथा संवादमार्फत समस्याको समाधान खोज्नु सरकारको पहिलो दायित्व भएको उल्लेख गर्दै सरकारले देखाएको उदासीनता, अत्यधिक बल प्रयोग र मौनताको आलोचना गर्नुभएको छ। हिंसात्मक गतिविधि तत्काल रोक्न र अविलम्ब संवादको माध्यमबाट समस्याको समाधान खोज्न उहाँले सरकारसँग आग्रह गर्नुभएको छ।
ओलीले मुलुक विषम परिस्थितिबाट गुज्रिरहेका बेला प्रमुख राजनीतिक दलहरूले आरोप–प्रत्यारोपभन्दा माथि उठेर शान्ति, सुरक्षा र स्थायित्वका लागि सहकार्य गर्नुपर्ने आवश्यकता औंल्याउनुभएको छ। साथै, द्वन्द्व र हिंसाले समस्याको समाधान नदिने भन्दै संवाद, सहमति र जिम्मेवार सहकार्यबाट मात्रै मुलुकले निकास पाउने विश्वास व्यक्त गर्नुभएको छ।
उहाँले राष्ट्रको शान्ति, सुरक्षा र सामाजिक सद्भाव जोगाउन सम्पूर्ण राजनीतिक दल, नागरिक समाज, बुद्धिजीवी तथा धार्मिक र सामाजिक अगुवाहरूलाई राष्ट्रिय हितका लागि एकजुट हुन आह्वान गर्नुभएको छ।
