काठमाडौं। पर्सा जिल्ला प्रशासन कार्यालयले वीरगञ्ज महानगरपालिकाका विभिन्न संवेदनशील क्षेत्रमा निषेधाज्ञा लागू गरेको छ। जिल्ला सुरक्षा समितिको सिफारिसका आधारमा जारी आदेशअनुसार बिहीबार साँझ ५ बजेदेखि शुक्रबार बिहान ६ बजेसम्म निषेधाज्ञा कायम रहनेछ।
प्रशासनले तोकिएको अवधिभर पाँच जनाभन्दा बढी व्यक्ति एकै स्थानमा भेला हुन, सभा आयोजना गर्न, जुलुस निकाल्न तथा कुनै पनि प्रकारका प्रदर्शन गर्न प्रतिबन्ध लगाएको जनाएको छ।
निषेधाज्ञा वीरगञ्ज महानगरपालिकाभित्र पूर्वतर्फ प्रतिमा चोक र बसपार्क बाइपास रोड, पश्चिमतर्फ तिलावे पुल, उत्तरतर्फ गण्डक चोक तथा दक्षिणतर्फ शंकराचार्य गेटसम्मको क्षेत्रमा लागू हुनेछ।
स्थानीय प्रशासनले शान्ति–सुरक्षा र सार्वजनिक व्यवस्था कायम राख्ने उद्देश्यले निषेधाज्ञा जारी गरिएको जनाएको छ। आदेश उल्लङ्घन गर्ने व्यक्तिमाथि प्रचलित कानुनबमोजिम कारबाही गरिने प्रशासनको चेतावनी छ।
