काठमाडौं । संयुक्त राज्य अमेरिकामा भएको सडक दुर्घटनामा एकजना नेपालीको मृत्यु भएको छ । तीन हप्ता अघिमात्रै अमेरिका गएका एक नेपालीको दुर्घटनामा परेर ज्यान गएको हो । नेपालको ठेगाना अनुसार बर्दिबास महोत्तरी घर भएका ५८ वर्षे विष्णुप्रसाद सापकोटाको बिहिबार ज्यान गएको हो ।
बिहान मर्निङ वाक गर्दागर्दै बाटो काट्ने क्रममा कारले ठक्कर दिँदा उनको घटनास्थलमा नै मृत्यु भएको केन्टुकी नेपाली समाजले जानकारी दिएको छ । श्रीमानको मृत्यु भएको खबर पाउनेबित्तिकै बेहोस भएकी बिमला सापकोटाको युनिभर्सिटी अफ केन्टुकी हस्पिटलमा उपचार गराइरहेको पनि समाजले जानकारी दिएको छ ।
विष्णुप्रसाद छोरी बिनिता सापकोटा र ज्वाईं रोशनराज घिमिरेलाई भेट्न अमेरिकाको केन्टुकीस्थित लेक्सिङ्टन गएका थिए । जानकारी अनुसार केन्टुकी नेपाली समाजले रोशनराज र बिनिता सापकोटालाई सहयोग स्वरुप ५० हजार डलर सहयोग दिने भएको छ ।