काठमाडौं । प्रधानमन्त्री वालेन्द्र शाहले वर्तमान सरकारले देशको आर्थिक विकास र समृद्धिका लागि पुँजी बजारलाई उच्च प्राथमिकतामा राखेको बताउनुभएको छ।
प्रधानमन्त्री तथा मन्त्रिपरिषद्को कार्यालयमा आइतबार पुँजी बजारका सरोकारवाला संस्था तथा नियमनकारी निकायका प्रतिनिधिहरूसँग भएको छलफलमा उहाँले पुँजी बजारमार्फत उद्यमशीलताको विकास र रोजगारी सिर्जना सरकारको मुख्य लक्ष्य रहेको स्पष्ट पार्नुभयो।
प्रधानमन्त्री शाहले पुँजी बजारलाई व्यावसायिक, पारदर्शी र मर्यादित बनाउनुपर्नेमा जोड दिँदै व्यवसायीहरूलाई उच्च मनोबलका साथ काम गर्न आग्रह गर्नुभयो। राम्रो काम गर्नेलाई सरकारले प्रोत्साहन गर्ने तर अनियमितता र गलत गतिविधिप्रति शून्य सहनशीलताको नीति अपनाइने उहाँको भनाइ थियो।
छलफलमा सहभागी पुँजी बजारका सरोकारवालाहरूले बजारको दिगो विकासका लागि कानुनी, नीतिगत, संस्थागत तथा प्रणालीगत सुधार आवश्यक रहेको औँल्याएका छन्। उनीहरूले प्रारम्भिक सार्वजनिक निष्कासन (आईपीओ) प्रणालीमा सुधार, दोस्रो बजारमा माग–आपूर्तिको सन्तुलन कायम गरी उचित मूल्य निर्धारण प्रणाली विकास तथा दैनिक कारोबार रकम ३० अर्ब रुपैयाँभन्दा माथि पुर्याउने वातावरण बनाउन सरकारसँग आग्रह गरेका छन्।
त्यस्तै, ब्रोकर कम्पनीहरूलाई मार्जिन कारोबारका लागि कर्जा प्रवाह सहज बनाउन नेपाल राष्ट्र बैंकले आवश्यक व्यवस्था गर्नुपर्ने, बैंक तथा वित्तीय संस्थाले धितोपत्र खरिद गरेपछि छ महिनासम्म बिक्री गर्न नपाउने व्यवस्था हटाउनुपर्ने तथा सेयर धितो कर्जाको सीमा पुनरावलोकन गर्नुपर्ने सुझाव पनि दिइएको छ।
सरोकारवालाहरूले व्यक्तिगत लगानीकर्ताको नोक्सानीमा कर समायोजनको व्यवस्था, कर्मचारी सञ्चय कोष, नागरिक लगानी कोष र सामाजिक सुरक्षा कोषलाई दोस्रो बजारमा लगानी गर्न प्रोत्साहन, नेपाल स्टक एक्सचेन्ज (नेप्से) को रणनीतिक साझेदारसहित पुनर्संरचना तथा गैरआवासीय नेपाली (एनआरएन) लाई पनि नेपाली पुँजी बजारमा लगानी गर्न सक्ने वातावरण सिर्जना गर्न माग गरेका छन्।
छलफलमा नेपाल धितोपत्र बोर्ड (सेबोन) का अध्यक्ष डा. गोपाल भट्टले आर्थिक वर्ष २०८३/८४ को पुँजी बजार नीति तथा ‘नेपालको पुँजी बजार मार्गचित्र–२०८३’ कार्यान्वयनमा ल्याइसकिएको जानकारी दिँदै त्यसअनुसारका कार्यक्रमहरू चरणबद्ध रूपमा कार्यान्वयन भइरहेको बताउनुभयो।
यस्तै, नेपाल स्टक एक्सचेन्ज (नेप्से) का अध्यक्ष अमृत लम्सालले बैंक तथा वित्तीय संस्था, बीमा तथा पुँजी बजारसँग सम्बन्धित आवश्यक कानुन संशोधन प्रक्रिया अघि बढिसकेको जानकारी दिँदै नेप्सेको पुनर्संरचनाका लागि उपयुक्त मोडालिटी तय गरी धितोपत्र कारोबारलाई थप प्रभावकारी र व्यवस्थित बनाइने प्रतिबद्धता व्यक्त गर्नुभयो।
छलफलमा स्टक ब्रोकर एसोसिएसन अफ नेपालका अध्यक्ष सागर ढकाल, नासा सेक्युरिटिजका प्रतिनिधि सन्दीप जलान, नेपाल लाइफ इन्स्योरेन्सका प्रतिनिधि नवराज सिलवाल, नागरिक स्टक डिलर कम्पनीका प्रमुख कार्यकारी अधिकृत महेश्वरलाल श्रेष्ठ, पुँजी बजार समितिका सभापति प्रियराज रेग्मी तथा लगानीकर्ता अम्बिकाप्रसाद पौडेललगायतको सहभागिता रहेको थियो।
