काठमाडौं । देशभर मनसुन सक्रिय भएसँगै धान रोपाइँको काम तीव्र गतिमा अघि बढेको छ। कृषि तथा पशुपन्छी विकास मन्त्रालयका अनुसार असार ३२ गतेसम्म देशभर औसत ६१.६२ प्रतिशत धान रोपाइँ सम्पन्न भएको छ।
मन्त्रालयको तथ्याङ्कअनुसार यस वर्ष धान खेती हुने १३ लाख ६६ हजार ५६२ हेक्टर क्षेत्रफलमध्ये हालसम्म ८ लाख ४२ हजार ६८ हेक्टर जमिनमा धान रोपाइँ सकिएको छ।
प्रदेशगत रूपमा सुदूरपश्चिम प्रदेश सबैभन्दा अगाडि रहेको छ, जहाँ ८७.०८ प्रतिशत रोपाइँ सम्पन्न भएको छ। त्यसपछि गण्डकी प्रदेशमा ६५.९ प्रतिशत, कर्णालीमा ६०.२ प्रतिशत, लुम्बिनीमा ५९.६ प्रतिशत, मधेशमा ५७.९ प्रतिशत, बागमतीमा ५७.१ प्रतिशत तथा कोशी प्रदेशमा ५४.९ प्रतिशत धान रोपाइँ भएको मन्त्रालयले जनाएको छ।
यद्यपि, गत वर्षको तुलनामा यस वर्ष रोपाइँको गति केही सुस्त देखिएको छ। गत वर्ष साउन ४ गतेसम्म देशभर ७२.१४ प्रतिशत धान रोपाइँ सम्पन्न भएको थियो भने यस वर्ष असार मसान्तसम्मको प्रगति ६१.६२ प्रतिशत मात्र पुगेको छ।
मौसमको अवस्था, पर्याप्त वर्षा र सिँचाइको उपलब्धताअनुसार आगामी केही दिनमा बाँकी क्षेत्रमा पनि रोपाइँले थप गति लिने अपेक्षा गरिएको कृषि मन्त्रालयले जनाएको छ।
