काठमाडौं । गणेश नेपालीको मृत्यु प्रकरणलाई लिएर गृहमन्त्री सुधन गुरुङ प्रतिनिधिसभामा आक्रोशित रूपमा प्रस्तुत भएका छन्।
शुक्रबार संसद् बैठकमा बोल्दै उनले विपक्षी सांसदहरूले सरकारमाथि मात्र दोषारोपण गरेको भन्दै प्रतिप्रश्न गरे। घटनापछि संसद्मा चर्को आवाज उठाउने नेताहरू घटना भएको दिन अस्पताल र घटनास्थलमा कहाँ थिए भन्ने प्रश्न उनले गरे।
गृहमन्त्री गुरुङले घटनास्थलमा ह्विल लक काठमाडौं महानगरपालिकाको नगर प्रहरीले लगाएको उल्लेख गर्दै त्यसको जिम्मेवारी स्थानीय तहसँग जोडिएको बताए। उनले स्थानीय सरकार र प्रदेश सरकार दुवै विपक्षीकै नेतृत्वमा रहेको दाबी गर्दै सम्पूर्ण जिम्मेवारी संघीय सरकारमाथि मात्रै थोपर्न नमिल्ने धारणा राखे।
‘संसद्मा घाँटी चिच्याएर कराउनेहरू हिजो अस्पतालमा को–को हुनुहुन्थ्यो? घटना भएको ठाउँमा ह्विल लक महानगर प्रहरीले लगाएको हो। स्थानीय सरकार कसको छ? प्रदेश सरकार कसको छ? दुई तहका सरकार तपाईँहरूकै नेतृत्वमा छन्,’ भन्दै उनले विपक्षीको आलोचना गरेका हुन्।
