काठमाडौं । राष्ट्रिय प्रजातन्त्र पार्टी (राप्रपा)का संसदीय दलका नेता ज्ञानबहादुर शाहीले सरकारका नीति, नियम र निर्णय धनी वर्गको हितमा केन्द्रित रहेको आरोप लगाउनुभएको छ। उहाँले यस्ता नीतिका कारण गरिब नागरिकहरू पीडित बन्न बाध्य भएको दाबी गर्दै गणेश नेपालीको मृत्यु पनि राज्यको नीतिगत असफलताको परिणाम भएको टिप्पणी गर्नुभयो।
शुक्रबार प्रतिनिधि सभा बैठकमा बोल्दै नेता शाहीले राज्यका निर्णयहरू गरिब, श्रमिक र निमुखा नागरिकको पक्षमा नभएको जिकिर गर्नुभयो। उहाँले सरकार सबैभन्दा बढी आवश्यक पर्ने वर्ग गरिब र विपन्न नागरिक भए पनि उनीहरूलाई राज्यले संरक्षण गर्न नसकेको आरोप लगाउनुभयो।
उहाँले गणेश नेपालीको आत्मदाह र त्यसपछि भएको मृत्यु राज्यको नीतिगत कमजोरीसँग जोडिएको दाबी गर्दै सरकारले आत्मसमीक्षा गर्नुपर्ने आवश्यकता औंल्याउनुभयो।
नेता शाहीले काठमाडौं सबै नेपालीको साझा राजधानी भएकाले यो अर्बपति र करोडपतिहरूको मात्र शहर बन्न नहुने बताउनुभयो। गरिब, श्रमिक र सर्वहारा वर्गलाई राजधानीमा सम्मानपूर्वक बाँच्ने वातावरण हुनुपर्ने उल्लेख गर्दै उहाँले अहिलेको अवस्था त्यसको विपरीत देखिएको टिप्पणी गर्नुभयो।
उहाँले सरकारका ऐन, नियम, नीति तथा मन्त्रिपरिषद्का निर्णयहरू समेत हुनेखाने वर्गको पक्षमा केन्द्रित रहेको आरोप लगाउँदै, आर्थिक रूपमा कमजोर नागरिकले राज्यबाट अपेक्षित संरक्षण र अवसर पाउन नसकेको धारणा राख्नुभयो।
साथै, नेता शाहीले प्रधानमन्त्रीसँग प्रश्न गर्दै काठमाडौं शहर धनी वर्गका लागि मात्रै हो कि सम्पूर्ण नेपालीका लागि भन्ने विषयमा सरकार स्पष्ट हुनुपर्ने बताउनुभयो।
