काठमाडौं । युवा, श्रम तथा रोजगार मन्त्री रामजी यादव र नेपालका लागि इजरायली राजदूत स्मुलिम एरी बासबीच बुधबार द्विपक्षीय भेटवार्ता भएको छ।
भेटवार्तामा पछिल्लो समय इजरायल जान लागेका नेपाली श्रमिकले भोगिरहेका समस्याका विषयमा विस्तृत छलफल भएको मन्त्रालयले जनाएको छ। विशेषगरी इजरायल जान इच्छुक श्रमिकका लागि गरिने स्वास्थ्य परीक्षण र भाषा परीक्षासम्बन्धी विषयमा दुवै पक्षबीच केन्द्रित छलफल भएको थियो।
मन्त्री यादव र राजदूत एरी बासले श्रमिकका समस्या समाधानका लागि निरन्तर संवाद र द्विपक्षीय भेटवार्ता जारी राख्ने प्रतिबद्धता व्यक्त गरेका छन्। उनीहरूले श्रमिकको हित र सुरक्षित वैदेशिक रोजगारी सुनिश्चित गर्न आवश्यक पहल अघि बढाउने बताएका छन्।
नेपालबाट इजरायलमा विभिन्न क्षेत्रमा रोजगारीका लागि जाने श्रमिकको संख्या बढ्दै गइरहेका बेला देखिएका व्यवहारिक समस्या समाधानका लागि दुई देशबीच समन्वयलाई थप प्रभावकारी बनाउने विषयमा पनि सहमति भएको जनाइएको छ।
