काठमाडौँ । सत्तारुढ राष्ट्रिय स्वतन्त्र पार्टी (रास्वपा)का सांसद सन्तोष राजवंशीले खेतीको मुख्य समयमा रासायनिक मलको अभाव हुँदा किसानहरू समस्यामा परेको बताएका छन्। उनले सरकारले तत्काल पर्याप्त मलको व्यवस्था गर्न माग गरेका छन्।
बुधबार प्रतिनिधिसभाको बैठकमा बोल्दै सांसद राजवंशीले कृषि उत्पादन र खाद्य सुरक्षासँग प्रत्यक्ष जोडिएको विषयमा सरकार गम्भीर बन्नुपर्ने आवश्यकता औँल्याए।
‘म भात खान्छु, सरकारले पनि भात नै खान्छ होला। त्यो भात धानबाट आउँछ, धान किसानको खेतमा फल्छ र त्यसका लागि मल आवश्यक पर्छ,’ उनले भने।
कृषिप्रधान देशमा हरेक वर्ष किसानले मल अभावको समस्या भोग्नुपरेको उल्लेख गर्दै उनले यस्तो अवस्था कहिलेसम्म रहने भन्ने प्रश्न गरे।
राजवंशीका अनुसार अन्नको भण्डार मानिने पूर्वका झापा, मोरङ र सुनसरी जिल्लामा हालसम्म करिब २८ प्रतिशत मात्रै धान रोपाइँ सम्पन्न भएको छ भने ७२ प्रतिशत रोपाइँ अझै बाँकी छ।
कृषि मन्त्रालयको सूचनाअनुसार करिब दुई सातापछि मल आउने तयारी रहेको उल्लेख गर्दै उनले उक्त मल समयमै किसानको खेतबारीसम्म पुग्ने व्यवस्था गर्न सरकारसँग आग्रह गरे।
