काठमाडौं । प्रतिनिधिसभा बैठकमा नेकपा एमालेका सांसद राजेन्द्र राईको अभिव्यक्तिलाई लिएर बुधबार केहीबेर तनाव उत्पन्न भएको छ।
बैठक सुरु हुनासाथ विपक्षी दलका सांसदहरूले उठेर विरोध जनाएपछि सभामुख डोलप्रसाद अर्यालले पहिलो चरणमा नेपाली कांग्रेस र त्यसपछि एमाले सांसद राजेन्द्र राईलाई बोल्न समय दिएका थिए।
आफ्नो मन्तव्य सुरु गर्दै सांसद राईले सभामुखज्यू, तपाईं कान सुन्नुहुन्छ कि सुन्नुहुन्न ? भन्दै प्रश्न गरेपछि सभामुख अर्यालले उनलाई तत्काल रोकेका थिए।
सभामुख अर्यालले सांसद राईलाई आफ्नो अभिव्यक्ति संसदीय मर्यादाभित्र रहेर राख्न निर्देशन दिँदै चेतावनी दिएका थिए। तर राईले बोल्न जारी राख्न खोजेपछि सभामुखले “सभामुखको अवहेलना गर्दै हुनुहुन्छ” भन्दै उनको माइक बन्द गराएका थिए।
त्यसपछि सभामुख अर्यालले सांसद राईलाई थप बोल्न नदिई अर्को वक्ताका रूपमा एमाले सांसद परशुराम तामाङलाई बोल्न समय दिएका थिए।
