काठमाडौँ। नेकपा (एमाले) का सांसद क्षितिज थेबेले सरकारको १०० दिनको कार्यकाल पूर्णतः असफल रहेको टिप्पणी गर्नुभएको छ ।
सोमवार संघीय संसद भवनबाहिर सञ्चारकर्मीहरूसँग कुरा गर्दै सांसद थेबेले सरकार जनउत्तरदायित्वबाट भागेको र संसदमा उठेका प्रश्नहरूको सामना गर्न डराएको आरोप लगाउनुभएको हो ।
सांसद थेबेले सरकारको कार्यशैलीलाई ‘परीक्षा नै बंक गरेको’ विद्यार्थीसँग तुलना गर्नुभयो । सरकारले निर्वाचनका समयमा गरेका वाचाहरू र नीति तथा कार्यक्रमबीच कुनै तालमेल नदेखिएको उहाँको तर्क छ। बजेट निर्माण प्रक्रियामा देखिएका गम्भीर त्रुटी र करका दर हेरफेरका विषयमा पनि सांसद थेबेले सरकारको आलोचना गर्नुभयो ।
विगतमा सानो त्रुटी हुँदा समेत छानबिन समिति बन्ने गरेको स्मरण गराउँदै उहाँले अहिले बजेट वक्तव्य सार्वजनिक हुनुपूर्व नै सूचना बाहिरिँदा र सात–सात पटक दर रेट हेरफेर हुँदा समेत सरकारले कुनै जवाफदेहिता नदेखाएको बताउनु भयो ।
उहाँले भन्नुभयो, ‘सरकारले परीक्षा नै दिएको छैन भने हामीले कसरी अंक दिने ? प्रधानमन्त्रीज्यू संसदमा आउनुहुन्न, प्रश्नहरूको जवाफ दिनुहुन्न। पुरानो दलले यसो ग¥यो र उसो ग¥यो भनेर मात्र सरकारको जिम्मेवारी पूरा हुँदैन । यति धेरै जवाफहीनता र जनताका प्रश्नबाट भाग्ने काम इतिहासमा यसअघि कहिल्यै भएको थिएन ।’
सांसद थेबेले सरकारका केही कदमहरूमाथि व्यङ्ग्य गर्दै सर्वोच्च अदालतको प्रधानन्यायाधीश नियुक्तिमा वरिष्ठता मिचिएको, राजनीतिक मुद्दाहरूमा दोहोरो मापदण्ड अपनाइएको र सार्वजनिक यातायातको रङ परिवर्तनजस्ता सतही काममा मात्र सरकार अल्झिएको आरोप लगाउनु भयो ।–न्युज एजेन्सी नेपाल
