विराटनगर। कोशी प्रदेशसभाको आजको बैठकमा ‘आर्थिक वर्ष २०८३÷८४ को सेवा र कार्यका लागि कोशी प्रदेश सञ्चित कोषबाट रकम विनियोजन र खर्च गर्ने सम्बन्धमा व्यवस्था गर्न बनेको विधेयक, २०८३’ माथिको छलफल प्रारम्भ भएको छ ।

छलफलमा कोशी प्रदेशसभा सदस्य प्रेमराज थाम्साङले विनियोजित बजेटले उत्पादन, रोजगार  समृद्धता ल्याउने क्षेत्र कृषि, पर्यटन र ऊर्जामा बजेट कम भएको चर्चा गर्नुभयो ।

उहाँले होल्डिङ सेन्टरमा रहेका सुकुमवासीलाई सरकारले उचित व्यवस्थापन गर्नुपर्नेमा जोड दिनुभयो । प्रदेशसभा सदस्य सपना दजीले उद्योग, कृषि र सहकारीका लागि सरकारले गरेको विनियोजनबाट अपेक्षित लाभ लिन नसकिने दाबी गर्नुभयो ।

प्रदेशसभा सदस्य खिनु लङ्वा लिम्बूले प्रदेशको ५६ निर्वाचन क्षेत्रलाई ध्यानमा राखेर सरकारले गरेको विनियोजनप्रति खुसी व्यक्त गर्नुभयो ।

कोशी प्रदेश सरकारका आर्थिक मामिला तथा योजनामन्त्री विदुरकुमार लिंथेपले विनियोजित बजेटप्रति कोशी प्रदेशसभाका सदस्यहरुले उठाएका जिज्ञासाप्रति सरकार गम्भीर रहेको धारणा राख्दै बजेटलाई सन्तुलन कायम गर्न सरकार सकारात्मक भएको बताउनुभयो । उहाँले बजेटको अङ्कको अनुपातलाई सच्याउने र छुटेका योजनाहरु समावेश गर्न सरकारले स्रोतको सुनिश्चितासँगै रु ८४ करोड बजेट व्यवस्थापन गरेको जानकारी दिनुभयो ।

कोशी प्रदेशसभाको अर्को बैठक शनिबार बिहान ११ बजे बस्ने सभामुख अम्बरबहादुर विष्टले जानकारी दिनुभयो । रासस
–––