पोखरा । राष्ट्रिय निजी तथा आवासीय विद्यालय एसोसिएसन नेपाल (नेसनल प्याब्सन) कास्की शाखाले संस्थामा आबद्ध विद्यालयका आधारभूत तहका अङ्ग्रेजी भाषा शिक्षकहरूको क्षमता अभिवृद्धि गर्ने उद्देश्यले शनिबार पोखरामा अङ्ग्रेजी भाषा शिक्षणसम्बन्धी एकदिने कार्यशाला सम्पन्न गरेको छ।
नेसनल प्याब्सन कास्कीका अध्यक्ष रोशन कोइरालाको अध्यक्षतामा आयोजित कार्यशालामा प्राध्यापक डा. जिवलाल सापकोटाले ‘पेडागोजिकल अभ्यासमा दृष्टिकोणगत परिवर्तन’ विषयमा सहजीकरण गरेका थिए। उनले विधागत शिक्षण, कविता तथा कथा शिक्षण, त्रुटि पहिचान र निराकरणका उपाय तथा प्रयोगात्मक सिकाइका विविध पक्षबारे प्रशिक्षण दिएका थिए।
कार्यक्रममा डा. सापकोटाले भाषिक शुद्धता, निरन्तर अभ्यास र विद्यार्थी–केन्द्रित शिक्षण पद्धतिमा जोड दिँदै सिद्धान्तभन्दा व्यवहारमुखी शिक्षण प्रभावकारी हुने बताए। उनले शिक्षकहरूलाई कक्षाकोठामा प्रयोगात्मक, सहभागितामूलक र विद्यार्थीमैत्री शिक्षण विधि अपनाउन आग्रह गरे।
कार्यक्रममा नेसनल प्याब्सन कास्कीका कोषाध्यक्ष कमल थापाले सञ्चालन गरेका थिए भने केन्द्रीय कार्यक्रम व्यवस्थापन समितिका संयोजक कमल रानाभाटलगायतले शुभकामना मन्तव्य व्यक्त गरेका थिए। सहभागी शिक्षकहरूले कार्यशाला व्यावहारिक, उपयोगी र प्रभावकारी भएको प्रतिक्रिया दिएका थिए।
कार्यशालामा नेसनल प्याब्सन कास्कीमा आबद्ध विद्यालयका ३० भन्दा बढी अङ्ग्रेजी भाषा शिक्षकहरूको सहभागिता रहेको थियो। कार्यक्रममा सङ्गम प्रकाशन र श्रद्धा प्रकाशनले प्राज्ञिक सहयोग गरेका थिए।
