काठमाडौं । राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनअन्तर्गत महामन्त्री पदका उम्मेदवार गणेश कार्कीले आफ्नो उम्मेदवारी लोकतान्त्रिक मूल्य, मान्यता र विधिको पक्षमा रहेको बताएका छन्।
सामाजिक सञ्जालमार्फत धारणा सार्वजनिक गर्दै कार्कीले लोकतन्त्र कोठाभित्र हुने सहमतिले नभई प्रतिनिधिहरूको स्वतन्त्र मतबाट सुरक्षित र बलियो बन्ने बताएका छन्।
उनले लेखेका छन्, “लोकतन्त्रलाई कोठाभित्रको सहमतिले होइन, प्रतिनिधिहरूको मतले सुरक्षित र बलियो बनाउँछ। महामन्त्रीमा मेरो उम्मेदवारी लोकतन्त्रको यही चरित्र, नीति र विधिका लागि हो।”
कार्कीले आफ्नो उम्मेदवारी कुनै व्यक्ति वा समूहविरुद्ध नभई पार्टीभित्र लोकतान्त्रिक अभ्यास, विधि र प्रतिनिधिको निर्णयलाई संस्थागत गर्ने उद्देश्यले रहेको स्पष्ट पारेका छन्।
रास्वपाको प्रथम महाधिवेशनअन्तर्गत महामन्त्री पदका लागि अन्तिम प्रतिस्पर्धामा गणेश कार्कीसहित पाँच जना उम्मेदवार मैदानमा छन्।
