काठमाडौं । राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत महामन्त्री पदको प्रतिस्पर्धा अब पाँच उम्मेदवारमा सीमित भएको छ। अन्तिम समयमा थप तीन जनाले उम्मेदवारी फिर्ता लिएपछि चुनावी समीकरण फेरिएको हो।
निर्वाचन आयोगका अनुसार प्रमोद न्यौपाने, राजुनाथ पाण्डे र गणेश पराजुलीले उम्मेदवारी फिर्ता लिएका छन्। यसअघि जगदीश खरेल र कविन्द्र बुर्लाकोटीले पनि आफ्नो उम्मेदवारी फिर्ता लिइसकेका थिए।
सुरुमा १० जनाले उम्मेदवारी दर्ता गराएको महामन्त्री पदमा अब मनिष झा, रन्जु दर्शना, गणेश कार्की, सागर ढकाल र विपिनकुमार आचार्यबीच प्रतिस्पर्धा हुने भएको छ।
उम्मेदवारी फिर्ताको क्रमसँगै रास्वपाको महामन्त्री पदको निर्वाचन पाँच प्रत्यासीबीचको अन्तिम भिडन्तमा परिणत भएको छ।
